Rivier gryp gesin op trekker, wa

PORT ELIZABETH. -  Mnr. Christo van der Walt (55) van die plaas Skurwekop by Adelaide en sy gesin het die naweek ’n noue ontkoming gehad toe die trekker en sleepwa waarmee hulle deur die vol Koonup­rivier wou ry deur die water meegesleur is.

Sy skoonma, me. Hester du ­Toit (77), en sy vrou, Wilna (52), was ook op die sleepwa toe die trekker Vrydagaand in die middel van die vol rivier gaan staan het. Du Toit en twee werkers op die trekker is na veiligheid gedra. Van der Walt en sy vrou het na die wal geswem.

Die brug op die Post Retief-sirkelroete het in Junie verlede jaar weggespoel. Boere het intussen ’n laagwaterbrug hoër op in die oewer gebou om met trekkers en viertrekvoertuie oor die rivier te kom. Dit is op dié gedeelte van die rivier waar die trekker en sleepwa Vrydagaand amper weggespoel het toe van der Walt sy gesin van Adelaide na die plaas wou bring en die rivier­vlak skielik begin styg het.

Pogings om die brug, wat daagliks deur sowat 20 boere in die omgewing gebruik word, deur die Oos-Kaapse paaiedepartement te laat herstel, sloer al agt maande en niks sal waarskynlik voor Junie daaraan gedoen word nie, het mnr. Theuns Botha, voorsitter van die Post Retief Landbouvereniging, gesê.

“Ons het die saak weer Maandag op ’n vergadering bespreek. Die paaiedepartement het tot dusver net skouers opgetrek en gesê daar is nie geld om in die huidige boekjaar herstelwerk aan die brug te doen nie.”

Dit sal na raming nagenoeg R450 000 kos om ’n nuwe brug te bou.

- Die Burger