Rinkhals het dalk uitgesterf in Kaapstad

Kaaptad

Hy mag dalk dood speel, of ’n spoeg of twee in jou rigting stuur, maar as jy dié slang sien, moet hom liefs nie probeer optel of doodmaak nie. Bel dadelik die naaste natuurbewaarder.

Nog nie ’n enkele rinkhals is die afgelope vyf jaar in een van Kaapstad se natuurreservate of natuurlike gebiede opgemerk nie. Dit is moontlik dat die rinkhals uitgesterf het in Kaapstad.

Baie bespiegel dat die uitwerking van verstedeliking die rinkhals, ’n slang van die kobrafamilie, tot op die randjie van uitsterwing gedryf het.

Volgens mnr. Owen Witt­ridge, bestuurder van die Helderberg-natuurreservaat, is die slang deesdae baie skaars in die Kaap. “Die slange was tot tien jaar terug baie algemeen in die Kaap. Daar is egter in die afgelope vyf jaar geen rinkhals in natuurreservate of natuurlike gebied in die Kaap gesien nie. As hulle vir vyf jaar nie opgemerk is nie, word hulle op die rooidatalys geplaas. Dit beteken hulle is op die randjie van uitsterwing.

“As die reptiel vir langer as tien jaar nie gesien word nie, word dit in dié gebied as uitgesterf verklaar.

“Die slang is al byna tien jaar nie opgemerk nie, so ons het besluit om ’n projek te begin wat die bewaring van die spesie sal insluit,” het Wittridge gesê.

Die afdeling biodiversiteitsbestuur van die stadsraad vra dat enige persoon wat ’n rinkhals die afgelope tien jaar in die Kaap gesien het, mnr. Grant Smith by 0218516982 of 0843281001 bel.

- Die Burger