Regter verwerp Roodt se appèlaansoek teen koerant
2012-02-07 00:00
- Artikelopsies
- Deel
- Kry Die Burger op
KAAPSTAD. – Dr. Dan Roodt mag nie appelleer teen ’n bevinding van die nasionale persombudsman dat dit geregverdig is om na hom as verregs en ekstreem te verwys nie.
Roodt, leier van die Pro-Afrikaanse Aksiegroep (Praag), het hom tot die persombudsman gewend nadat die onafhanklike kommentator Ilse Bigalke in die rubriek “Van hekse kom nie altyd onheil” so na hom verwys het. Die rubriek het op 24 November 2011 in Die Burger verskyn en Roodt het aangevoer hy word daardeur beswadder.
Dr. Johan Retief, adjunk-persombudsman, het vroeër vanjaar in sy bevinding Die Burger se verweer aanvaar dat die verwysings geregverdigde kommentaar en in die openbare belang is.
Roodt het by regter Ralph Zulman, voorsitter van die SA Persraad se appèlkomitee, aansoek gedoen om teen die bevinding te appelleer. Zulman het pas bevind Retief se bevinding is gepas.
Omdat daar geen redelike vooruitsig is dat die appèlkomitee tot ’n ander beslissing as dié van die adjunk-ombudsman kan kom nie is Roodt se aansoek om verlof tot appèl van die hand gewys.
- Die Burger