Rathbone onthul stryd met depressie
2012-02-04 03:00
- Artikelopsies
- Deel
- Kry Die Burger op
JOHANNESBURG. – Clyde Rathbone, voormalige kaptein van die Suid-Afrikaanse o.21-span en Wallaby-rugbyspeler, het op sy Facebook-blad onthul hoe hy as kind emosioneel mishandel is en tot onlangs nog met depressie geworstel het.
Rathbone (30), wat in Durban gebore is en ná 2002 na Australië verhuis het, het onlangs op die webwerf Riotact en op Facebook onthul hoe hy aan depressie gely het ná sy gedwonge uittrede uit rugby weens beserings.
Hy het ook geskryf hoe hy as kind emosioneel mishandel is “deur iemand wat na hom moes omsien”.
Hy het sy lewe omgekeer nadat sy vrou, Carrie, uit die huis getrek het en hy Julian Smith se blog, In over your head, gelees het.
Nou hoop hy sy storie kan ander ook help.
Rathbone vertel hoe die mishandeling hom ’n deurmekaar, opstandige en kwaai kind gemaak het.
“ ’n Aantal dinge kan gebeur as jy emosioneel mishandel word. Ek het daardie negatiewe stem begin glo totdat dit ingegrawe was by my.
“Dit het my geraak in alles wat ek doen.”
Sy uittrede uit rugby op die ouderdom van 27 jaar het sy situasie vererger.
Selfs in sy speeldae vir Australië se nasionale span was hy nie heeltemal gelukkig nie.
“Wat in my kinderdae gebeur het, het my nooit verlaat nie. Die gebeure het in ander vorme gemanifesteer.
“Ek was kwaad, geïrriteerd en gespanne sonder om te weet waaroor.”
Hy het op ’n tyd selfs aan selfmoord gedink en sy vrou verbaal mishandel.
Dinge het verlede jaar só erg geraak dat sy vrou ’n tas gepak en by ’n vriendin ingetrek het.
Hy het ’n sielkundige gaan spreek, soos Carrie hom al in die verlede gesmeek het om te doen.
Hy het weer begin werk, oefen, ’n dieet gevolg en ou vriende opgesoek.
Die afgelope ses maande al het hy geen depressie gehad nie, en hy voel nou of niks hom kan onderkry nie.
Rathbone wil graag nou sy verhaal met soveel mense moontlik deel vir wie dit dalk iets kan beteken.
- Die Burger