Prof. Jordaan se dood skok PE

PORT ELIZABETH. – Huldeblyke stroom in ná die dood van prof. Danie Jordaan, voormalige direkteur van die Nelson Mandelabaai Metropolitaanse Universiteit (NMMU) se Skool van Taal, Media en Kultuur.

Jordaan is Saterdagoggend om 02:30 ná ’n lang stryd teen kanker in die Life St. George-hospitaal oorlede.

Hy was veral bekend vir veral sy rol om mediastudies en joernalistiek by die universiteit te vestig.

Mev. Bianca Wright, hoof van joernalistiek, media en filosofie by die NMMU, het gesê sy dood is ’n skok.

“Hy het soveel jare teen kanker geveg.

“Elke keer wanneer hy ’n terugslag gehad het, het hy terugbaklei, en ons het gedink en gehoop hy sal dit weer doen,” het Wright gesê.

Sy het gesê Jordaan is in 1998 met gevorderde velkanker gediagnoseer en sy prognose op dié tydstip was hy sou nog net een jaar leef.

Jordaan was tot sowat twee jaar gelede direkteur van die Skool van Taal, Media en Kultuur voordat hy met siek- en daarna met sabatsverlof gegaan het.

Hy het sy loopbaan as Afrikaans-onderwyser begin voordat hy in die jare negentig by die NMMU as dosent in Afrikaans aangestel is.

Volgens Wright het hy besef die taalfakulteit sou net oorleef indien dit aanloklike programme aanbied.

“Hy het hom beywer vir die vestiging van mediastudies by die NMMU. In 1999 het ons begin met 25 studente en nou maak ons voorsiening vir tussen 300 en 400 studente.”

Jordaan word oorleef deur sy vrou, dr. Christina Jordaan van die NMMU se Onderwys­fakulteit, sy seun, Johan Jordaan, en dogters Emmarentia Venter en Danielle Jordaan.

Geen begrafnisreëlings was teen druktyd bekend nie.

- Die Burger