Owerheid se Jetstream-beperkings ‘tien keer strenger as wêreldnorme’
2010-01-06 05:55
- Artikelopsies
- Deel
- Kry Die Burger op
Pretoria
Die Burgerlugvaartowerheid (BLO) in Suid-Afrika pas beperkings toe wat tien keer strenger is as die internasionale norme vir Jetstream-vliegtuigenjins.
As die owerheid deur die bank dié strenger maatreëls op alle operateurs toepas, gaan dit ’n slagting in die plaaslike lugvaartbedryf veroorsaak, het lugvaartkenners gister gewaarsku.
Die waarskuwing kom nadat die BLO kort voor Kersfees al 13 van SA Airlink se Jetstream 41’s aan diens onttrek het. Ander operateurs is kort daarna ingelig dat hul Jetstreams ook aan diens onttrek word totdat dit geïnspekteer is.
Die internasionale norm is 0,1 vlieginsidente per 100 000 vlieg-ure; Airlink se syfer beloop 0,01 insidente per 100 000 vliegure.
Die BLO het opgetree nadat een van Airlink se vliegtuie in September by Durban ’n pletterlanding weens ’n defek in die een enjin uitgevoer het. Die vliegtuig sou op een enjin kon land, maar die “gesonde” enjin is toe deur een van die vlieëniers afgeskakel.
Mnr. Anthony Nourse, direkteur en aandeelhouer in Nomic, ’n vliegtuigverhuringsmaatskappy, het appèl teen die besluit by die BLO aangeteken nadat albei sy Jetstreams verbied is om te vlieg.
“Ons is glad nie in die besluit geken nie. Ek het bloot ’n kennisgewing gekry dat my vliegtuie nie verder mag vlieg nie,” het ’n ontstelde Nourse gister gesê.
Hy het dadelik geappelleer. Die BLO het 30 dae om te reageer.
“Die owerheid het dadelik ’n span saamgestel en dié is die afgelope twee dae besig om my vliegtuie en dokumentasie te inspekteer. Ek het geen probleem daarmee nie, want ek weet daar skort niks met my onderneming nie.
“Ek gaan miljoene rande aan inkomste verloor. Dit is ’n potensieel dodelike slag,” het Nourse bygevoeg.
“Ons word nou saam met Airlink oor dieselfde kam geskeer net omdat ons dieselfde vliegtuie gebruik.”
Me. Karin Murray, Airlinkwoordvoerder, het gister gesê die maatskappy se diens tussen Port Elizabeth en Oos-Londen en van Port Elizabeth na Bloemfontein is steeds opgeskort, maar hul ander geskeduleerde vlugte gaan voort.
Geen kommentaar kon gister van die BLO verkry word nie.
- Die Burger