Opening kos R6m.

KAAPSTAD. – Die parlement het R6 miljoen begroot vir môreaand se parlementsopening en die onthaal ná pres. Jacob Zuma se staatsrede.

Dié bedrag is bykans dieselfde as verlede jaar, het voorsittende beamptes van die parlement gister volgehou.

Tog word die onthaal nie vanjaar soos gewoonlik in ’n swierige plek soos die Kaapstadse Internasionale Konferensiesentrum gehou nie, maar bespaar die parlement kostes deur dit in ’n markiestent in die parkeerterrein oorkant die parlement te hou. Die parlement besit dié terrein.

Vervoerkostes word ook bespaar omdat gaste “sommer net oor die pad kan stap”, het mnr. Max Sisulu, speaker van die parlement, gister op ’n nuuskonferensie gesê.

Die tema van vanjaar se geleentheid is “die kennisekonomie en ontwikkelingsgeleenthede”. Dit is geïnspireer deur Suid-Afrika se bod om die reuse-teleskoop die Square Kilometer Array (SKA) te huisves.

Sisulu het gesê die rede vir die besluit vir vanjaar se tema is dat Suid-Afrika saam met agt ander lande op die vasteland die bod ingesit het om die SKA te huisves.

’n Besluit oor waar die SKA gehuisves gaan word, word teen einde Maart verwag.

Sisulu het gesê indien Suid-Afrika suksesvol is om die SKA in die Karoo te huisves, sal dit ’n positiewe uitwerking op tegnologie, wiskunde en wetenskap in die land hê.

Volgens hom kan Suid-Afrikaners “werk, werk, werk” in Zuma se staatsrede verwag.

“Werk, werkskepping en die groei van die ekonomie” gaan waarskynlik sterk in die toespraak na vore kom.

Zuma se toespraak sal om 19:00 regstreeks op televisie, radio, grootskerm-TV in openbare plekke en op die parlement se webwerf uitgesaai word.

Vanjaar se seremonie sal deur oudpres. F.W. de Klerk bygewoon word. Oud-adj.pres. Baleka Mbete, dr. Frene Ginwala, voormalige speaker van die Nasionale Vergadering, oudhoofregter Pius Langa en mnr. Lovemore Moyo, speaker van die parlement in Zimbabwe, sal ook die verrigtinge bywoon.

Oudpres. Thabo Mbeki het gistermiddag laat weet dat hy nie meer die geleentheid kan bywoon nie omdat hy ’n hoëvlakafvaardiging van die Afrika-unie se implementeringsplan oor Noord- en Suid-Soedan moet lei.

Die staatsrede sal onder meer voorafgegaan word deur ’n erewag van die berede polisie wat Zuma sal begelei, ’n pryssanger buite en binne die parlement, ’n optrede van die weermagorkes, ’n verbyvlug van die lugmag en ’n saluut van 21 skote.

Zuma sal na verwagting in sy toespraak verwys na infrastruktuurontwikkeling, die landbou, mynwese, vervaardiging, die groen ekonomie en toerisme.

- Die Burger