Onsekerheid heers oor Maroga se posisie

Kaapstad

Onsekerheid rondom die posisie van mnr. Jacob Maroga, wat verlede week as Eskom-bestuurshoof bedank het, duur te midde van ’n rasseherrie voort. Dít volg nadat Maroga uit verskeie oorde – insluitend die ANC-jeugliga – steun ontvang het ná berigte verlede week dat hy op versoek van die Eskom-raad bedank het.

Nie hy of Eskom het egter enige verklaring uitgereik nie en dit was gister steeds onduidelik wie presies by Megawattpark in beheer is.

’n Eskom-woordvoerder het by navraag gesê dié kwessie sal môre op die spits gedryf word wanneer die minister van openbare ondernemings, me. Barbara Hogan, ’n aankondiging “oor dié baie sensitiewe kwessie” sal maak. Hy het gister berigte verwerp dat Maroga Eskom-werknemers en die media vandag tegelyk sou toespreek.

Dit kom te midde van ’n rassestorm wat om Maroga se kop losgebars het. Luidens berigte het die Black Management Forum (BMF) gesê Maroga het “nie bedank nie” en openbare ondernemings het “ ’n slaghuis vir swart bestuurslui” geword. Die DA het gewaarsku die debat rondom wanbestuur by die nasionale elektrisiteitsvoorsiener word onnodig met ras gekleur. “Dis die laaste ding wat ons nodig het, veral omdat dit nou krities is om energieverskaffing vir die toekoms te verseker,” het mnr. Cobus Schmidt, DA-LP en woordvoerder oor energie, in ’n verklaring gesê.

Dít volg op die onthulling Vrydag van notas in Maroga se handskrif op ’n afskrif van die omstrede Olsen-verslag, waarin hy geskryf het haar aanbevelings weerspieël “die fenomeen van wit toesighouding in Eskom”.

Schmidt meen dit wil voorkom of Maroga die aanbevelings deur die Amerikaanse konsultant me. Susan Olsen verwerp het bloot omdat sy wit is.

Benewens onvoldoende interne beheer het Olsen bevind “Eskom se primêre kragopwekkingsvermoë word deur ineenstorting in die gesig gestaar en kan nie aan die huidige behoeftes voldoen nie, laat staan toekomstige behoeftes.”

Schmidt beskryf die verwysing deur Maroga na die “wit fenomeen” as “skandelik”.

- Die Burger