Nyda vies oor hy ‘min geld’ ontvang

KAAPSTAD. – Die Nasionale Jeugagentskap (Nyda) is vies oor die “min geld” wat vir die 2012-’13-boekjaar vir hom begroot is.

Mnr. Andile Lungisa, Nyda-voorsitter, het gesê die Nyda het minstens R405miljoen uit die begroting verwag.

Slegs R386miljoen is egter vir die Nyda begroot.

Lungisa het gesê geen rede is vir die besnoeiing gegee nie.

“Dit is R29miljoen minder as wat verwag is. Ons sal nou ons strategiese doelwitte en teikens moet aanpas. Die Nyda-kantore wat ons dwarsoor die land wou open sodat jeugdiges oral toegang kan kry, sal drasties moet verminder.

“Programme vir vaardigheidsontwikkeling sal verminder moet word. Dit is ’n groot terugslag vir ons. Met die regering se groot infrastruktuurplanne is vaardighede nodig. Indien ons nie jeugdiges die vaardighede aanleer nie, gaan hulle weer net toeskouers word van groot projekte.”

Die Nyda het vroeër onder skoot gekom omdat hy meer as R100miljoen bestee het aan ’n jeugfees wat as die “fees van ballonne en soene” bestempel is.

Die R40miljoen wat die Nasionale Lotery-raad tot die Nyda-fees bygedra het, het gister in die parlement ook weer onder skoot gekom.

Dr. Wilmot James, DA-LP, het in ’n verklaring gesê dit lyk of politieke en persoonlike bande die dryfveer agter dié en sekere ander skenkings was. “Die mense wat besluit het om miljoene rande aan Cosatu en die Nyda te gee, moet verantwoordelik gehou word.”

Volgens hom wil die bestuur van die Loteryraad voorgee dat klagtes oor die skenkings onregverdig en onrealisties is.

Die openbare beskermer ondersoek nog die skenkings.

- Die Burger