Nuwe middel teen malaria werk op muise
2010-09-03 22:44
- Artikelopsies
- Deel
- Kry Die Burger op
Kaapstad – ’n Nuwe middel wat blitsig van die malaria-parasiet ontslae kan raak, het reeds positiewe resultate opgelewer.
Die middel het die parasiet in muise ná ’n enkele dosis uitgewis en sal in die nabye toekoms ook op mense getoets word.
Dit is die eerste nuwegenerasie-middel teen malaria in tien jaar.
Dit het effektief getoets teen albei stamme van die malaria-parasiet, Plasmodium falciparum en Plasmodium vivax, het die Amerikaanse nasionale instituut vir allergie en oordraagbare siektes aangekondig.
Die studie, gelei deur dr. Thierry Diagana van die Norvartis-instituut vir tropiese siektes, het ’n verbinding getoets en ontwikkel wat ’n parasiet-proteïen teiken, wat bestaande middels nie kan doen nie.
Die verbinding werk vinniger as ouer middels, maar nog nie so vinnig soos die beste middel, artemisinin, nie.
Dit is nie giftig vir menslike selle nie en kan in pilvorm toegedien word.
Volgens die navorsing, wat in die vaktydskrif Science gepubliseer is, was dit ná net ’n enkele dosis effektief in die muise.
Tans is die behandeling teen malaria tussen drie en sewe dae, met middels wat tussen een en vier keer per dag geneem moet word.
Jaarliks sterf sowat ’n miljoen mense, hoofsaaklik in Afrika, aan die siekte.
- Die Burger