Nóg ’n renoster by Loskopdam geskiet

Middelburg

’n Renoster wat deur stropers gekwes is, was teen gisteraand nog soek in die Loskopdam-natuurreservaat.

Vier witrenosters is die afgelope drie weke in dié reservaat doodgemaak.

Veldwagters, polisiebeamptes en bekommerde lede van die gemeenskap het gister ure lank na die gekweste dier gesoek.

Volgens mnr. Jannie de Bruyn, hoof van die teenstropingseenheid van die Mpumalanga-toerisme-en-parke-agentskap, is die dag oue karkas van ’n volwasse renosterkoei gisteroggend gevind.

“Veldwagters het die omgewing gepatrolleer en op die karkas van ’n renosterkoei afgekom. Die gekweste renoster is ook in hierdie stadium deur ander veldwagters gesien. Ons weet egter nie wat die geslag van die gekweste renoster is nie. Hy is onder die een oog geskiet, maar sal heel moontlik self herstel.”

Die renoster is gister gedissekteer om die koeël vir die polisie-ondersoek uit te haal.

Volgens mnr. Rey Thakhuli van Sanparke is daar al vanjaar 368 renosters landwyd gestroop.

Veldwagters van die Krugerwildtuin het gister tydens ’n voetpatrollie in die Onder Sabie-gebied op ’n ontbindende karkas van ’n ou witrenosterbul afgekom, berig Buks Viljoen.

Aasvoëls wat in die lug bokant die karkas gesirkel het, het hulle daarheen gelei. Die dier is na raming reeds ’n week gelede geskiet.

Volgens me. Laura Mukwe­vho, woordvoerder van die wildtuin, is albei die horings afgesaag.

Dit is die tweede renosterkarkas wat binne 72 uur in die wildtuin ontdek is.

- Die Burger