Nóg R400 000 se belastinggeld vir sokkerfieterjasies
2010-09-16 04:15
- Artikelopsies
- Deel
- Kry Die Burger op
Kaapstad - Nóg ’n staatsdepartement het duisende rande van belastingbetalersgeld aan vanjaar se Wêreldbeker-sokkertoernooi bestee.
Die departement van openbare werke en sy filiale – onder meer die konstruksiebedryf-ontwikkelingsraad, die statutêre raad vir bou-ontwikkeling en die onafhanklike ontwikkelingstrust – het altesaam R400 000 op sokkermemorabilia soos Bafana Bafana-hemde, vuvuzelas en vlae uitgegee.
Dít het gister geblyk in antwoord op ’n parlementêre vraag uit DA-geledere.
Die departement van openbare werke het dié besteding verdedig deur te sê sy amptenare en bestuurders het gereeld te doen met kliënte en dat dit noodsaaklik was om op dié manier die departement se steun aan die nasionale sokkerspan te demonstreer.
Die departement het ’n volledige uiteensetting van die besteding deur die onderskeie filiale gegee. Dit behels:
- R166 747 wat die departement van openbare werke aan sokkerhemde bestee het;
- R9 673 wat Agrément Suid-Afrika (die plaaslike filiaal van die internasionale boutegnologie-organisasie) vir sokkerhemde opgedok het;
- R78 590 wat die konstruksiebedryf-ontwikkelingsraad uitgegee het op onder meer sokkerhemde en die huur van ’n Suid-Afrikaanse vlag en twee plasma-TV’s; en
- R139 000 wat die onafhanklike ontwikkelingstrust opgedok het vir onder meer lessenaarvlaggies en serpe (R36 000), en Zakumi-gelukbringers en makarapas (R13 000). Die ander R90 000 is bestee aan 1 000 vuvuzelas wat met kralewerk oorgetrek is.
Die departement van openbare werke en sy filiale het in hul antwoord op die DA se vraag daarop gewys dat al die aankope deur óf die rekenpligtige beampte óf deur die betrokke uitvoerende komitees goedgekeur is.