Neem my in hegtenis en gee al my geld vir armes – Malema

Johannesburg - Neem my dan in hegtenis. Só het mnr. Julius Malema, leier van die ANC-jeugliga, die owerhede gister in sy toespraak voor studente by die Universiteit van Johannesburg (UJ) se Doornfontein-kampus uitgedaag.

City Press het die naweek berig Malema het glo belasting ontduik.

Hy het sedert sy verkiesing in 2008 tot leier van die ANC-jeugliga nie sy belastingopgawes ingedien nie en sy maatskappye word deur die Suid-Afrikaanse Inkomstediens (SAID) ondersoek, is berig.

“Daar is niemand wat my in hegtenis kan neem nie, want daar is niks wat ek verkeerd gedoen het nie,” het hy gesê.

Volgens Malema skuld hy Jan Taks niks.

“Julle het die reg: (mnr.) Pravin Gordhan (minister van finansies), SAID en al die owerhede om in my (bank)rekening te kyk,” het hy gesê. “Ek gee julle toestemming om alles te vat wat in my rekening is en dit aan die armes te gee.”

Malema meen as hy R140 miljoen uit regeringstenders gemaak het, kan daardie geld aan arm studente gaan.

“Vat my geld en nasionaliseer dit,” het hy gesê.

Malema het gesê hy sal nooit van armes steel nie: “Ek ken armoede. Ek lees nie oor armoede nie, ek leef ’n lewe van armoede.

“Ek is ’n kind van ’n huiswerker wat arm gesterf het,” het hy gesê.

Hy het herhaaldelik gesê hy betaal sy belasting.

“As ek aan enige misdaad skuldig is, neem my dan in hegtenis,” het hy dit uitgebasuin.

Malema glo hy moet nie onderworpe wees aan ’n “leefstyl-oudit” wat ingestel is “om sekere faksies te dien en spesifieke mense in die proses wil verwoes nie”.

Hy glo hy is net verantwoordbaar aan die “armstes van die armes – nie dié in Sandton nie... hulle stem nie vir ons nie”.

Hy glo hy hoef nie ’n SAID-sertifikaat vir sy maatskappye te kry wat bevestig sy opgawes is op datum nie, want dié maatskappye is dormant.

Volgens hom wil sekere mense die jeugliga muilband.

“As jy ’n slang suksesvol wil doodmaak moet jy dit hard op die kop slaan. En dit is wat hulle met my probeer.”

- Die Burger