Ndumiso Jaca gekap oor sy uitlatings oor Bees Roux
2010-09-03 22:44
- Artikelopsies
- Deel
- Kry Die Burger op
Pretoria – Opposisiepartye het gister uitgevaar teen dir. Ndumiso Jaca, hoof van proaktiewe polisiëring in die Tshwane-metropolisie, oor sy tirade by sers. Ntshimane Johannes Mogale se roudiens in Pretoria.
Jaca het Donderdag in ’n uitbarsting gesê die Tshwane-metropolisie gaan die Blou Bul-stut Bees Roux teister totdat hy die waarheid vertel.
Roux is verlede week op aanklag van moord op Mogale in hegtenis geneem.
Jaca het ’n direkte waarskuwing aan Roux gerig: “Ons gaan padversperrings beman en seker maak dat Bees nie rus nie. Ons gaan ons voorvaders kry om Bees te teister totdat hy die waarheid vertel.”
Me. Karen Meyer, DA-woordvoerder oor gemeenskapsveiligheid in die Tshwane-metroraad, het gesê Jaca se uitlatings is onverantwoordelik en ongrondwetlik.
“Dit blyk Jaca het homself as ’n metropolisieman, regter en laksman aangestel.
“Hy is ’n amptenaar wat veronderstel is om ’n diens aan alle inwoners in Tshwane te lewer en te verseker, maar sy uitsprake is teenstrydig hiermee.”
Volgens Meyer is Jaca se uitsprake totaal onvanpas, buite sy mandaat en nie in die gees van ’n onafhanklike regsproses nie.
Dr. Rentia Landman, VF+- leier in Tshwane, meen Jaca se uitlatings is skokkend.
“Ek het eintlik nie woorde nie. Dit is iemand wat reg en orde moet handhaaf wat sulke uitlatings maak. Dit bring ernstige bedenkinge oor sy geskiktheid vir dié pos.”
Me. Dikeledi Lehobye, Tshwane se burgemeesterskomiteelid vir gemeenskapsveiligheid, het gesê sy is jammer oor die taal wat Jaca by die roudiens gebruik het, maar het ook vir hom in die bres getree.
“Mense moet besef daar is baie seerkry in die departement oor die wyse waarop sers. Mogale vermoor is.”
Enigiemand wat deur Jaca se uitlatings ontstel is, moet hulself in die skoene plaas van diegene wat saam met Mogale gewerk het en hul pyn in ag neem, het Lehobye gesê.
“Dit is kommerwekkend dat ons geen ondersteuning gekry het van diegene wat ons nou kritiseer nie.”
Mnr. Terrance Mashego, ANC-hoofsweep in die Tshwane-raad, het gister gesê hy was uitstedig en dra nie kennis van Jaca se uitlatings nie.
“Ek sal eers wil uitvind presies wat gesê is voordat ek my daaroor kan uitlaat.”
- Die Burger