Moslem-raad hou vol hy tree korrek op in halaal-debakel

ATHLONE.

Hy het nie verkeerd opgetree toe hoender by Orion Cold Storage as halaal gesertifiseer is nie, het die Moslem Juridiese Raad (MJR) gister gesê.

Orion Cold Storage in Muizenberg is in Desember verlede jaar daarvan beskuldig dat hy vleisprodukte wat nie halaal is nie, oorgemerk het as halaal en dat die MJR wetend halaal-sertifikate hiervoor uitgereik het.

Moulana Abdul Fataagh Carr, ’n uitvoerende lid van die MJR, het op ’n nuuskonferensie in die MJR-kantore in Crawford, Athlone, gesê alle produkte wat die raad vir Orion gesertifiseer het, was in minstens vier verskillende lae van verpakking voordat dit by Orion se perseel aangekom het.

Volgens hom is die hoender in dieselfde soort verpakking van Orion se perseel af na die aankoper vervoer.

Intussen het dit bekend geword dat Orion Cold Storage slegs een vragmotor het waarmee aflewerings gedoen word, en dat produkte wat halaal en nie halaal is nie saam vervoer word.

Mnr. Patrick Gaertner van Orion wou nie hierop reageer nie.

Mnr. Imraahn Mukaddam, Wes-Kaapse koördineerder van die Nasionale Verbruikersforum, het gister buite die MJR se kantore die leiers van die MJR as “Mafia-agtige rampokkers” beskryf. Hy het gesê hulle laat toe dat Moslems vleis eet wat nie halaal is nie, net om hulself te verryk.

Ontevrede Moslems wat buite die kantore hul misnoeë te kenne gegee het, is deur sekerheidsbeamptes verhoed om met die leiers van die MJR te praat. Intussen het sjeg Ebrahim Gabriels van die MJR gesê ’n e-pos waarin beweer word dat die MJR die halaal-sertifikasie van Nando’s onttrek het, is ’n slenter.

- Die Burger