Matriekvraag oor eiers bekommer LP

KAAPSTAD. – Hoeveel eiers is in twee en ’n half dosyn?

Dít is een van die vrae wat glo in ’n 2011-matriekvraestel vir wiskundige geletterdheid gevra is en wat ’n DA-LP gister die kop laat skud het.

Mnr. Donald Smiles, DA-LP wat in die parlementêre komitee vir basiese onderwys dien, het sy bedenkinge uitgespreek oor die gehalte van sommige vrae wat aan matrieks gestel is.

Die nasionale departement van basiese onderwys en die gehalteversekeringsliggaam Umalusi het voorleggings oor die 2011-matriekeksamen aan die komitee gedoen.

Smiles het gevra wat presies met so ’n vraag op matriekvlak gemeet word.

“Ek verstaan nie hoe so ’n vraag in ’n matriek-wiskundevraestel kan kom nie. Wat word getoets? Die konsep dosyn – en dit op matriekvlak?”

Hy het gevra die departement moet ondersoek instel na dié vraag, aangesien hy nie seker is van die presiese bewoording nie.

Dr. Rufus Poliah, waarnemende hoofdirekteur van nasionale eksamens in die departement, het ook ander kwelpunte uitgewys wat in Umalusi se assessering van verlede jaar se vraestelle opgeduik het.

Boonop word dieselfde kortverhale reeds tien jaar lank op matriekvlak vir Afrikaans as tweede bykomende taal voorgeskryf. Volgens Poliah kan dit daartoe lei dat dié vraestel lank reeds te voorspelbaar is.

Umalusi het aanbeveel dat die voorgeskrewe werk hersien moet word.

Me. Annette Lovemore, DA-LP, wou weet hoe dit kan wees dat vraestelle waarvan Umalusi die gehalte nagaan op so ’n swak peil is soos die Engels-vraestel wat matriekleerders moes skryf.

In Umalusi se verslag is daar ook na 11 vakke in besonder gekyk en spesifieke probleme geïdentifiseer.

Talle van die probleme word aan swak onderrig toegeskryf.

Poliah het gesê daar sal vanjaar gefokus word op skooldistrikte wat onderpresteer en spesifieke aandag sal aan wiskunde, fisiese wetenskappe, lewenswetenskappe en rekeningkunde gegee word.

- Die Burger