Man skiet ‘prostituut’ en pleeg selfmoord

Kaapstad

’n Man het gistermiddag selfmoord gepleeg kort nadat hy ’n 17-jarige meisie, wat na bewering ’n prostituut is, by ’n bordeel in Goodwood geskiet het.

Volgens insp. Wayne Theunis, ’n polisiewoordvoerder, het die man homself as ’n klant van die tiener voorgedoen toe hy haar in die woonstel in Joubertstraat, waar sy woon, besoek het.

Dié woonstel is glo ’n bekende bordeel in die gebied.

“Hy het die meisie geskiet en uit die woonstel gehardloop toe ’n polisiebeampte, wat van diens af was, hom gesien het.

“Die polisieman het hom agternagesit en tot in Nelsonstraat gejaag, waar die man sy vuurwapen op die beampte gerig het,” het Theunis gesê.

Die polisieman het toe sy dienspistool op die man gerig, waarna die man homself in die kop geskiet het. Hy is op die toneel dood.

Die identiteit van die oorledene was gisteraand nog nie bekend nie, en dit is tans nie duidelik of die man en meisie mekaar geken het nie.

Die meisie woon saam met drie vriende wat glo die blyplek verlaat het toe die man daar aangekom het. Die meisie is in ’n bevredigende toes­tand in die hospitaal.

- Die Burger