Malema vuur plaasmoorde aan, meen opposisie
2010-03-15 23:38
- Artikelopsies
- Deel
- Kry Die Burger op
Kaapstad
Die gewraakte vryheidsliedjie “Maak dood die Boere” wat verlede week deur mnr. Julius Malema, leier van die ANC-jeugliga, gesing is, vuur plaasmoorde aan.
Só het opposisiepartye gister gesê te midde van drie plaasmoorde wat die afgelope naweek plaasgevind het.
Die ANC-leierskorps is hewig gekritiseer oor hul versuim om Malema daaroor voor stok te kry.
Volgens mnr. Athol Trollip, die DA se parlementêre leier, stuur dié liedjie, wat Malema voor ’n gehoor by die Universiteit van Johannesburg gesing het, die boodskap uit dat wit boere steeds die vyand van die staat is.
“Ons land het ’n bloedige verlede wat nie juis ’n bron van nasionale trots is nie. Dit het op almal emosionele letsels gelaat wat net onder die veloppervlak broei. Uitsprake soos dié krap hierdie wonde weer oop.”
Dit is verbysterend dat nóg pres. Jacob Zuma nóg die ANC se sekretaris-generaal, mnr. Gwede Mantashe, bereid is om Malema hieroor te straf, het Trollip gesê.
Die Vryheidsfront Plus het op sy beurt in ’n verklaring gesê Malema is aandadig aan die “uitwissing van boere in Suid-Afrika”.
Dr. Pieter Mulder, leier van die VF+, het verlede week ’n klag van haatspraak teen Malema by die polisie aanhangig gemaak.
- Die Burger