Malema vra beter begrip vir swartes, sê Krog

Kaapstad

Die uitsprake van mnr. Julius Malema, president van die ANC-jeugliga, is die resultaat van ’n versugting by swart mense “om beter verstaan te word”.

Malema verwoord “dit wat ons nie wil hoor nie omdat hy meen daar bestaan ’n gebrek aan begrip”, het die skrywer Antjie Krog hier gesê.

Dié digter en oudjoernalis het voor die Kaapse Persklub oor haar jongste boek, Begging to Be Black (uitgegee deur RandomHouse/Struik), gepraat. Die boek is die derde deel van ’n drieluik wat Country of My Skull en A Change of Tongue insluit.

Volgens haar sê ’n deel van haar ­indien die media anders verslag gedoen het, sou daar nie ’n nodigheid vir Malema bestaan nie.

“Die media se waghondrol kan nooit oorbeklemtoon word wanneer ’n mens oor demokrasie praat, óf die blootstelling van korrupsie óf die instandhouding van vryheid van spraak nie. Dit is ’n gegewe en ek dink die meeste van ons stem saam dat die media uitstekende werk doen.”

Maar in ’n land wat op ’n verdeelde verlede en gefraktureerde moraliteite gebou is, moet die media ook onder meer die rol van “kulturele tolk” en bevorderaar van verdraagsaamheid vertolk.

Om ’n bespotting van sekere swart persoonlikhede te maak en hulle te verguis – selfs al is hulle skuldig aan korrupsie – maak hulle dikwels net meer gewild.

Dit is waarom “miljoene” mense met Malema saamstem.

- Die Burger