Malema se stellings oor regbank ‘naïef’
2012-02-16 00:00
- Artikelopsies
- Deel
- Kry Die Burger op
JOHANNESBURG. – Dit is naïef en beledigend om te beweer die regbank word deur wit rassiste beheer, het adv. Jacob van Garderen, nasionale direkteur van Regslui vir Menseregte, gister gesê.
Hy het gereageer op mnr. Julius Malema, geskorste leier van die ANC-jeugliga, se aanval op die regbank.
“Om die regbank sonder meer af te maak as ’n stelsel wat nie legitiem is nie omdat dit deur ’n minderheid wit mense beheer word, is feitelik verkeerd,” het Van Garderen gesê.
“Meer as 60% van die regbank is swart. Kyk na die leierskorps. Die hoofregter is swart, so ook sy adjunk. Die president van die appèlhof is swart en sý adjunk ook. Al die regter-presidente van die verskillende divisies is swart.”
Volgens die departement van justisie en grondwetlike ontwikkeling se jongste jaarverslag was daar in 2011 91 swart, 91 wit, 22 Indiër- en 21 bruin regters.
Videomateriaal wat die naweek tydens die ANC-jeugliga se lekgotla geneem is, wys hoe Malema die regbank afmaak as ’n stelsel wat deur die “wit Mafia” beheer word.
“Ek het advokate wat my verdedig in die saak waarvoor die Valke my jaag. Hulle is drie wit advokate.
“Elke keer wat ek saam met hulle in ’n vergadering sit, raak ek geïrriteerd. Dié ding wat ek doen, is verkeerd, maar daar is niks wat ek kan doen nie, want die regbank word deur die wit minderheid beheer,” het Malema gesê.
Die Valke en die openbare beskermer ondersoek tans klagte van korrupsie en tenderbedrog teen Malema.
- Die Burger