Maatskappyhoof koop huis vir sokkertoernooi-verblyf

Kaapstad

’n “Bekende internasionale maatskappy” het pas R28 miljoen vir ’n luukse huis in Kampsbaai opgedok sodat sy uitvoerende hoof dit ten tyde van aanstaande jaar se Wêreldbeker-sokkertoernooi kan gebruik.

Mnr. Ian Slot, besturende direkteur van Seeff Eiendomme in Kampsbaai, het gesê die huis, met vyf slaapkamers en vyf en suite-badkamers, is gekoop vir die uitvoerende hoof van ’n bekende internasionale maatskappy.

“Volgens inligting wat ons ontvang het, gaan die huis eksklusief gebruik word ten tyde van die Wêreldbeker-sokkertoernooi aanstaande jaar. Wat hulle daarna (met die huis) gaan doen, weet ons nie.”

Slot het gesê hy vermoed die huis sal daarna verhuur word. Dit is geleë in Ronald-laan, wat beskryf word as een van Kampsbaai se mees eksklusiewe strate.

Slot het gesê dis die ideale onthaalhuis, met al die slaapkamers wat óf ’n see-uitsig óf ’n berg-uitsig het. Dis ’n goeie kopie in dié prysklas.

Volgens hom is Suid-Afrika tans die “geur van die maand”. Baie huiskopers die afgelope maand of twee was mense wat in Suid-Afrika was vir die finale loting vir die Wêreldbeker-toernooi.

“Hulle het gesien wat die land kan bied en het besluit om hier te belê.”

Volgens hom is baie van die miljoenêrshuise wat hulle verkoop nie die nuwe eienaars se tuistes nie. “Dis vir baie van hulle slegs ’n oornagplek wanneer hulle in die land is en word as goeie beleggings beskou.”

Die R28 miljoen wat vir dié huis betaal is, is nie naastenby die duurste huis wat hulle al verkoop het nie. Slot het gesê hulle het verlede jaar ’n woonstel in die One & Only-hotel in Kaapstad vir R111 miljoen verkoop.

Volgens hom is daar nog heelwat woonstelle in die V&A Waterfront wat in daardie prysklas val.

- Die Burger