Loui Fish was ‘glad nie’ onder die invloed

Kaapstad

“Volgens my was ek beslis nie onder die invloed van drank nie. Ek het vir ’n slaggat in die pad uitgeswaai.”

Die TV-aanbieder en glanspersoonlikheid Loui Fish het gister in ’n openhartige gesprek gesels oor die voorval Maandagaand omstreeks 19:00 toe sy in Sandton deur de polisie in hegtenis geneem is op aanklag van dronkbestuur.

Fish is die mede-aanbieder van die skinderprogam Tonge Los op ­kykNET. Sy sou ook Maandag begin skiet het as mede-aanbieder van die realiteitsreeks Verander My, vir die Afrikaanse satelliet-TV. Sy het egter besluit om nie meer die program aan te bied nie en net op Tonge Los te fokus.

Nadat sy ná haar inhegtenisneming na ’n distriksgeneesheer by die Hillbrow-polisiekantoor geneem is, is sy agter in die polisievoertuig na Sandton teruggebring. Dáár is borgtog van R1000 omstreeks 23:00 aan haar toegestaan. Sy moet eers op 7 September aanstaande jaar in die Randburgse landdroshof verskyn.

Fish sê sy en haar man, die gewese Bafana-sokkerster Mark Fish, het die middag gaan uiteet. Sy verwys na Fish as haar “eks”, maar hulle is twee jaar gelede net van tafel en bed geskei. Hul skeisaak kom aanstaande jaar voor.

“Mark het ’n bottel rooiwyn bestel. Ek het één glasie daarvan gedrink, nogal met Coke gemeng.

“Daarna is ek huis toe. Ek is ’n baie versigtige bestuurder. Ek het vir ’n slaggat in die pad uitgeswaai en kort daarna het die polisie, wat ek agter my sien ry het, my gestop en is ek in hegtenis geneem. Ek vermoed hulle het die wyn op my asem geruik.

“Dit was nie so erg vernederend nie as traumaties om agterin ’n polisievangwa te moet ry. Die hele ervaring was trouens vir my baie traumaties.

“Ek was glad nie onder die invloed van drank nie. Regtig nie.”

- Die Burger