Krygkor se reislus laat Jan Alleman opdok

Kaapstad

Krygkor se direksie en senior werknemers het sedert April verlede jaar bykans R2,5 miljoen bestee om wapententoonstellings wêreldwyd by te woon.

Grootkoppe soos mnre. Popo Molefe, Krygkor-voorsitter, en Sipho Thomo, geskorste bestuurshoof, het selfs eersteklas gevlieg en R63 362 elk bestee aan retoervlugte na ’n tentoonstelling in Maleisië in April verlede jaar.

Voorts het belastingbetalers ook bykans R120 000 opgedok sodat Molefe en twee ander direksielede se vroue hulle na die Verenigde Arabiese Emirate (VAE) en Londen kon vergesel.

Molefe en mnr. Winston Mosiako se gades se besigheidsklas-retoerkaartjies na Londen het in September vanjaar bykans R48 000 elk gekos. Mnr. Sifiso Msibi se vrou het in Februarie teen R23 109 na die VAE saamgevlieg. Daar is nie ekstra vir verblyf betaal nie omdat die vroue die hotelkamers met hul mans gedeel het.

Dr. Lindiwe Sisulu, minister van verdediging, het dié besonderhede bekend gemaak in antwoord op ’n parlementêre vraag van mnr. David Maynier, DA-LP en woordvoerder oor verdediging. Maynier het gesê die uitgawes is skokkend.

“Molefe sal volgende jaar in die parlement moet kom verduidelik wie die reise goedgekeur het en wie besluit het dat belastingbetalers moet uithaal sodat direksielede se vroue hulle kan vergesel.”

Direksielede het ook uitstallings in Frankryk, Brasilië en Suid-Afrika bygewoon en meestal ten duurste in vyfsterhotelle soos die Sheraton Khalidaya in Abu Dhabi tuisgegaan. Die verblyfkostes vir al agt tentoonstellings beloop meer as R1,1 miljoen.

’n Krygkor-taakspan wat die direksie telkens vergesel het, het gewoonlik in ekonomiese klas gevlieg, maar ook in die luukse hotelle geslaap. Lt.genl. Solly Shoke, hoof van die leër, het die Krygkor-afvaardiging na Maleisië en die VAE vergesel.

“Ek kan nie verstaan hoekom Krygkor, en nié die weermag nie, vir Shoke betaal het,” het Maynier gesê.

“Krygkor kla altyd hy kry nie genoeg geld van die regering nie, maar pleks van hul gordels in te trek, vlieg die topbestuur soos fat catsin besigheidsklas.”

- Volksblad