Konsepwet kan einde van safari’s beteken

Vanderbiljpark

Die begin van die einde het aangebreek vir olifant­safari’s in Suid-Afrika.

Dít is as die wetgewing, soos vervat in die huidige konsep oor die bestuur van olifante in gevangeneskap, deurgevoer word.

Olifantsafari’s is ’n omstrede bedryf wat miljoene rande per jaar werd is.

Dit sal ook beteken dat geen bykomende olifante, buiten dié wat reeds opgelei is, in sirkusse gebruik sal kan word nie.

Mnr. Rory Hensman, eienaar van Elephants for Africa Forever (Efaf) en ’n bekende olifanttemmer, het gister gesê as die huidige konsepwetgewing oor die bestuur van olifante in aanhouding deurgevoer word, vat hy sy goed en trek weg.

Volgens Hensman is dit duidelik die regering wil die mat onder die bedryf “uittrek”. Hy het gesê hy is “werklik moedeloos” met die manier waarop die regering die land se wild bestuur.

Hy het glo wetenskaplike bewyse daarvan dat olifante “gelukkig” is in aanhouding omdat dié diere in Suid-Afrika reeds meer as 98% van hul habitat verloor het.

Organisasies soos Public Watch, Four Paws South Africa, die International Fund for Animal Welfare en dierebeskermingsverenigings het die konsepwetgewing verwelkom.

Hulle meen beleidmakers het die jongste wetenskaplike bewyse oor olifantgedrag, asook die diere se aard in ag geneem by die opstel van die konsepwetgewing.

Die konsepwetgewing, waarby openbare kommentaar nou bygewerk sal word, verbied onder meer die oplei en mak maak van olifante deur die gebruik van swepe, latte of porstokke of enige ander instrumente wat pyn of ongemak veroorsaak.

Me. Louise Joubert van Sanwild, ’n rehabilitasiesentrum by Gravelotte, het gesê soos die konsepwetgewing nou daar staan, sal dit dus “onmoontlik” wees om ’n Afrika-olifant op te lei of mak te maak.

Dit sal dus die safaribedryf indirek keer om uit te brei.

Ingevolge die konsepwet mag jong olifante nie van hul ma’s verwyder word nie.

Nét familiegroepe mag gevang word met die oog daarop om hulle mak te maak en aan te hou.

- Die Burger