Stellenbosch. – ’n Vrou van die Strand is bekommerd oor haar
vyfjarige malteserpoedel, Scrappy, wat agter in haar motor was toe dit
Vrydagaand gekaap is.
Me. Sandra Lizamore (55) het Vrydagaand na haar vriend se huis in
Darriesstraat, Strand, gery. Hy was nie tuis nie en sy het drie huise verder
stilgehou om hom met haar selfoon bel.
Terwyl sy die oproep gemaak het, het ’n man haar hand met die
selfoon gegryp, die kettings om haar nek afgepluk en haar uit die motor
geboender.
Twee mans het in die motor geklim.
“My hondjie het agter gesit,” het Lizamore gister gesê.
Sy het deur die oop motorruit geleun en na die een man se gesig
gekrap, maar hulle het weggejaag.
Lizamore het gister gesê sy is vol blou kolle soos sy op die grond
neergegooi is en haar keel is seer geskree.
“Waar is jy nou veilig? Dit gebeur so gou. Wat maak jy as twee mans
jou aanval? Wat kan jy nou doen?” het sy gevra.
Benewens die selfoon en die ander besittings wat saam met die
silwer Mazda gebuit is, is dit veral oor Scrappy dat sy haar bekommer. Sy wonder
of haar aanvallers vir Scrappy uit die motor gegooi of dalk van kant gemaak
het.
“Wáár is sy? Het hulle haar (by die motor) uitgegooi of
vrekgemaak?” het Lizamore gevra.
“Dit is nou maar my ou baby in die huis. Sy was altyd by my. Wat
kan mens nou doen? Dit is nie ’n aardse besitting nie; dit is jou maatjie. Dit
was maar soos ’n kind.”
Volgens Lizamore het Scrappy ’n halsbandjie om haar nek waarop haar
naam en Lizamore se telefoonnommer is.
Gistermiddag laat het die polisie nog nie op Die Burger se navraag
gereageer nie. – Jan Gerber