Kapenaar swem myl in ysige water
2011-09-02 00:00
- Artikelopsies
- Deel
- Kry Die Burger op
Kaapstad
Die Kaapse tiener wat die noordelike deel van Kanada saam met die ontdekkingsreisiger Mike Horn en sewe ander jong mense verken, het vandeesweek ’n myl in ysige water geswem.
Henko Roukema (19) van Durbanville het Dinsdag in die Noordelike Yssee tussen Groenland en Baffin-eiland in Nunavut in noordelike Kanada 1,6km (een myl) ver geswem om mense bewus te maak van aardverwarming.
Hy studeer maritieme studies aan die Kaapse Skiereiland Universiteit vir Tegnologie (KSUT).
Hy besoek die Nunavut-streek in Kanada as deel van Horn se jeug-ontdekkingsreis, die Young Explorers Expedition (YEE). Die doel is om inheemse Inuïet-gemeenskappe en die gebied waar hulle woon beter te leer ken.
“Ek is oorstelp van vreugde dat ek die afstand kon voltooi, maar ook hartseer om in hierdie water te kan swem,” het Henko op sy blog geskryf.
Die gebied waar hy geswem het, is gewoonlik vasgevries.
“Die werklikheid is presies waarvoor ons as mense die bangste is, veral die werklikheid van wat met die wêreld en die klimaat gebeur – die werklikheid wat my toelaat om ’n myl ver in die Arktiese deel van Kanada kan swem!”
Die temperatuur van die seewater was 4,6°C en die wind het boonop gewaai, wat dit volgens Henko baie, baie koud gemaak het.
Hy is ’n ervare ysswemmer wat gereeld deelneem aan kompetisies in ysige water, soos die Cadiz-swemkompetisies aan die Weskus en die jaarlikse Speedo Africa Ice Swim naby Fraserburg.
“’n Mens móét genoeg in yswater oefen voor ’n mens so iets aanpak,” het hy op sy blog geskryf.
Hy is na die tyd deur Horn gelukgewens.
Hy keer Dinsdag terug na Suid-Afrika.
- Die Burger