Jong Kapenaar kuier by Eskimo’s in Kanada

Kaapstad

’n Jong Kapenaar ontdek tans die noordelike dele van Kanada nadat hy gekies is om saam met ’n bekende ontdekkingsreisiger na die Inuïet-gemeenskappe in dié gebied te reis.

Henko Roukema (18) van Durbanville is een van agt jong mense wat sedert 14 Augustus saam met die ontdekkingsreisiger ­Mike Horn die ysige toestande in die noorde van Kanada aandurf.

Die jong mense uit lande soos Suid-Afrika, Switserland, Pole, Oostenryk en Duitsland besoek die Nunavut-streek in Kanada as deel van Horn se jeug-ontdekkingsreis, die Young Explorers Expedition (YEE). Die doel is om inheemse Inuïet-gemeenskappe en die gebied waarin hul woon beter te leer ken.

Roukema was in Junie by ’n avontuurkamp op die dorpie Chateaux d’Oex in Switserland, waar hy vir die ekspedisie gekies is.

Die span het pas ’n staptog van vier dae oor ’n gletser voltooi nadat hulle op Horn se boot, die Pangaea, tussen ysberge geseil het. Roukema, wat ’n dagboek in die vorm van ’n blog hou, het op die YEE-webtuiste geskryf hy en die span het die kans gekry om op ’n ysberg te staan.

Hy het ook ’n ysbeer gewaar. “Ek het nie gedink ek sou ooit ’n regte ysbeer kon sien nie,” het hy geskryf. “Hierdie is waarlik die kans van ’n leeftyd.”

Roukema moes homself deeglik voorberei vir die avontuur en het in die weke voor sy vertrek daagliks ure se fisieke aktiwiteite soos swem, fietsry, bergklim en hardloop gedoen.

Hy het ook in ys gebad om homself gewoond te maak aan die ysige temperature in die gebiede wat hy sou besoek.

Roukema, wat maritieme studies aan die Kaapse Skiereiland Universiteit van Tegnologie (KSUT) studeer, neem gereeld deel aan kompetisies in ysige water, soos die Cadiz-swemkompetisies en die Speedo Africa Ice Swim naby Fraserburg.

Hy keer op 4 September terug na Suid-Afrika.
 

- Die Burger