Ikey se protes is ‘teen irrasionele boelies’

Kaapstad

“My protes is nie teen die president of die ANC nie. Dit is teen polisielede met die mentaliteit dat hulle eiereg kan gebruik.”

Só het mnr. Chumani Maxwele (25), die Ikey-student wat verlede week in hegtenis geneem is, gister aan Die Burger gesê.

Die polisie beweer Maxwele is aangehou omdat hy sy middelvinger vir pres. Jacob Zuma gewys het toe dié se bloulig-konvooi by hom verbygery het.

Maxwele hou vol hy het nie sy middelvinger gewys nie, maar met sy hand na die konvooi gewaai en gesê “hamba” (gaan weg), omdat die konvooi ’n lawaai gemaak het.

“Ek het nie eens geweet dit is Zuma se konvooi nie.”

Hy glo hy was die slagoffer van “irrasionele boelies wat hul lyf grootmeneer hou”.

Maxwele, ’n ANC-lid van Woodstock, het verlede Woensdagaand gedraf toe die konvooi by hom verby gery het.

Een van die voertuie het stilgehou en hy is op aanklag van verset teen inhegtenisneming en crimen injuria in hegtenis geneem.

Hy moes in die voertuig klim. Die polisie het ’n sak oor sy kop getrek en hom byna 24 uur aangehou.

Hy is eers geneem na die Rondebosch-polisiekantoor en later na die Mowbray-polisiekantoor, waar hy tot verlede Donderdagmiddag aangehou is.

Hy is nooit ingelig die aanklagte is teruggetrek nie en hy het dit deur die media uitgevind.

Hy het besluit om sy storie bekend te maak omdat “só baie regte geskend word deur mense wat daarop aanspraak maak hulle het die hoogste verantwoordelikheid om die wet toe te pas”.

“Dié storie gaan oor ’n atleet wat geteister en verneder is, en nie sy betrokkenheid by die ANC of enige ander instelling nie.”

Daarom wil Maxwele nie sê waarvandaan hy kom of wat hy studeer nie.

Intussen het me. Helen Zille, premier van die Wes-Kaap, gister die Mowbray-polisiekantoor besoek. Sy wou haar toesighoudende rol vervul deur haar te vergewis van die omstandighede waarin Maxwele aangehou is.

“As ’n mens in hegtenis geneem word omdat hy ’n vinger wys vir die president se konvooi, gaan ons dieselfde pad as Zimbabwe stap. Dit moet nou gestop word.”

Zille het die voorval as ’n “ernstige misbruik van mag” beskryf.

Sy het die kwessie ook op ’n vergadering met mnr. Nathi Mthethwa, minister van polisie, bespreek.

Mnr. Robert McDonald, Zille se woordvoerder, het gesê Mthethwa het haar gevra om vir hom ’n verslag oor die gebeure saam te stel.

- Die Burger