Hondjie amper bokveld toe na arend hom vang

 ’n Yorkshire-terriër uit die Vrystaat het die naweek by die dood omgedraai toe ’n ­breëkoparend hom gegryp en uit die lug op ’n grondpad laat val het dat sy ribbes breek.

Die arend se kloue het ook die hondjie se longe deurboor.

Max, die sesjarige Yorkie, en sy eienaar, me. Ellen Pike van Bloemfontein, het by mnr. Philip Fourie van die wildplaas Tuinskloof in die Patensie-distrik gekuier toe die arend Saterdag omstreeks 11:30 vir Max opgeraap het.

“Ons neem aan die arend het Max van die stoep af gegryp en toe hier onder langs die grondpad laat val, want daar was geen spoor of merk rondom hom nie,” het Pike gesê.

Sy en Fourie se seun, Philip jr., het met ’n motorfiets na beeste gaan kyk toe hulle langs die pad op Max afkom. Hulle het gesien hoe ’n groot breëkoparend van hom af wegvlieg.
“Dit was verskriklik traumaties. Max was heeltemal bewusteloos en het geroggel terwyl hy swaar asemgehaal het.
“Ek was bitterlik ontsteld.

 Hy is soos my kind.”Max is dadelik na die veearts op Humansdorp geneem, waar hy later geopereer is.

Daar was ’n skeur van twee sentimeter baie naby aan sy hart en sy longe het platgeval.Teen gistermiddag was hy stabiel, maar sy longe moes steeds gedreineer word.

Volgens Fourie is daar baie breëkoparende op sy plaas wat al vir lammerskade verantwoordelik was.“Hulle vang ook klein rooibokke en springbokke. Die breëkop­arend is die grootste arend in Afrika met ’n vlerkspan van tot 2,9 meter.

Volgens Pike moes die arend gedink het Max is ’n dassie of so iets. – Erika Ferreira