Hof laat hom nie uit oor visum

KAAPSTAD. – Die Wes-Kaapse hooggeregshof het gister nie ’n beslissing oor die regering se hantering van die Dalai Lama se visum-aansoek gevel nie, aangesien dit “geen praktiese waarde” sou hê nie.

Sekere bekommernisse oor dié optrede is egter wel geopper.

Regters Elizabeth Baartman en Dennis Davis het eenparig in die Wes-Kaapse hooggeregshof ’n aansoek van mnre. Mangosuthu Buthelezi, IVP-leier, en Mo­siuoa Lekota, ­Cope-leier, met koste van die hand gewys. Dié twee het ’n aansoek teen die departemente van binnelandse sake en internasionale betrek- kinge en samewerking gebring oor hul optrede rakende die Dalai Lama se vi­sum­aansoek.

Die Dalai Lama sou emeritus-aartsbiskop dr. Desmond Tutu se 80ste verjaardagpartytjie op 7 Oktober verlede jaar bywoon, maar het sy reis gekanselleer weens ’n gesloer met die visumaansoek.

Die regters het bevind dat ’n hofbevel geen praktiese uitwerking sou hê nie weens die buitengewone omstandighede van dié saak. Die gebeurtenis waarheen die Dalai Lama genooi is, het lank gelede plaasgevind.

Die Dalai Lama het ook sy vi­sumaansoek teruggetrek.

Lekota en Buthelezi het die Dalai Lama genooi om Menseregtedag in Maart vanjaar in Suid-Afrika by te woon.

Daar is egter geen bewyse dat die Dalai Lama hierdie uitnodiging aanvaar het nie, het die regters bevind.

Daar is egter geen rede tot kommer dat die hof in die toekoms nie tot die Dalai Lama (of enige ander verontwaardige visumaansoeker) se bystand sal kom nie, mits die omstandighede gepas is en hulle die hof nader, het die regters gesê.

In Davis se geskrewe uitspraak het hy sekere bekommernisse oor die departement van binnelandse sake se hantering van die kwessie geopper.

Een hiervan was dat die Dalai Lama se verteenwoordigers verkeerde advies gegee is oor die tydperk waarvoor die visum geldig sou wees.

’n Ander was dat die minister en die direkteur-generaal van binnelandse sake teenstrydige antwoorde gegee het oor waarom daar ’n vertraging met die besluit oor die visumaansoek was.

Dr. Mario Ambrosini, IVP-LP, het in reaksie gesê die IVP oorweeg om teen die beslissing te appelleer, berig Rajaa Azzakani.

- Die Burger