Hoë bedank oor fiasko met snelbusdiens

Kaapstad

’n Jaar van hoogdrama met die omstrede Kaapstadse snelvervoer-busdiens het gelei tot die bedanking gister van een van die mees senior amptenare in die Kaapstadse munisipaliteit.

Benewens ’n kort verklaring het die Kaapse stadsraad en die betrokke amptenaar, mnr. Eddie Chinnappen, onderneem om verder tjoepstil oor die fiasko te bly.

Dit volg nadat daar vroeër vanjaar op die laaste nippertjie deur die munisipaliteit se afdeling van vervoer, paaie en stormwater aan die portefeuljekomitee oor finansies verslag gedoen is dat ’n berekeningsfout van R2 miljard met dié busdiens gemaak is.

Nie alleenlik is die kapitaaluitgawes vir dié busdiens onderbereken nie, maar die jaarlikse operasionele uitgawes van R125 miljoen is ook buite berekening gelaat.

Gister het die Kaapse stadsraad in ’n verklaring bekend gemaak dat Chinnappen, voorheen uitvoerende direkteur van vervoer, paaie en stormwater, bedank het voordat ’n tugproses oor sy betrokkenheid by die fiasko voltooi kon word.

In die verklaring van net ses paragrawe word min gesê oor die fyner besonderhede van die fiasko met die onderberekening van die kostes.

Daar word egter uitdruklik gesê nié Chinnappen of die stadsraad gaan enige verdere kommentaar lewer op sy betrokkenheid by die fiasko nie.

Dié hoë amptenaar gaan nie sy kennisgewingtydperk van drie maande uitwerk nie en daar gaan ook nie ’n tugproses wees nie.

Luidens die verklaring is ’n proses van private mediasie op versoek van Chinnappen gevolg.

Met die afhandeling van dié proses het Chinnappen bedank.

Die onafhanklike mediator, me. Sarah Christie, het voorgestel dat Chinnappen se bedanking in ooreenstemming met sy werkkontrak aanvaar word en dat daar nie aangevoer of bevind is dat Chinnappen bedrog gepleeg het of oneerlik was nie.

Daar is ook nie aangevoer of bevind dat Chinnappen se optrede sy integriteit geskaad het nie, aldus die verklaring.

Die stadsraad het vroeër reeds aangekondig dat slegs ’n beperkte deel van die oorspronklike Fase 1A van die busdiens voltooi gaan word.

Nou word daar eers daarop gefokus om aan die vervoervereistes vir die Wêreldbeker-sokkertoernooi van 2010 te voldoen.

Benewens die onderberekening was daar vanjaar ’n verdere terugslag met dié reuse-projek weens die ekonomiese insinking en geldtekorte wat die plaaslike en die nasionale regering ondervind.

- Die Burger