Hlophe ontken hy wou Langa nie groet

Johannesburg

Die regter-president van die Wes-Kaap, regter John Hlophe, het ’n brief aan regter-president Pius Langa gefaks waarin hy ontken dat hy gesê het hy het geweier om Langa se hand te skud “omdat ek nie ’n wit man se hand gaan skud nie”.

Hlophe het dié uitlating glo in ’n onderhoud met die Mail & Guar­dian(M&G) gemaak. Hy het glo ook afbrekend na die konstitusionele hof se regters verwys as “groen togas, wit geregtigheid”.

In die brief wat Hlophe Dinsdag aan Langa gefaks het, sê hy dit was iemand anders wie se hand hy geweier het om te skud.

Volgens hom het die M&G se verslaggewer vir hom gevra of hy ’n persoon, “wat dié (verslaggewer) na verwys het as ’n ‘wit man’, ’n rassis genoem het”.

Dít is glo ’n verwysing na regter Wilfred Thring.

Volgens Hlophe het hy aan die verslaggewer verduidelik dat Langa voorgestel het hy moet dié man se hand skud.

“Ek het geweier om dit te doen, want ek was so woedend,” skryf Hlophe.

Hy skryf hy het twee keer Langa se hand geskud by die onlangse RDK-sitting in Johannesburg en “ek sou nooit op só ’n kleinerende manier oor u gepraat het nie”.

Hy het ook gesê dat hy die “werk en simboliek van die konstitusionele hof as heilig” beskou.

Hy het gesê hy beskou die M&G-berig as “vals (en) kwaadwillig” en dring daarop aan dat die koerant die berig terugtrek.

Die redakteur van die M&G, Nic Dawes, het gesê hy staan by die juistheid van die berig.

Adv. Marumo Moerane SCD, woordvoerder van die RDK, het vroeër die week gesê die RDK sal die beweerde uitlatings ondersoek nadat hulle seker gemaak het dat die M&G se berig korrek was.

Dit was gister nog nie duidelik of die RDK al die juistheid van die berig kon bevestig of nie.

Hy het gesê die M&G-berig sal “heel waarskynlik” môre bespreek word wanneer die RDK se klagtekomitee by die O.R. Tambo-lughawe vergader.

Ondertussen het die burgerregte-inisiatief AfriForum gister bekend gemaak dat hy ’n amptelike klagte teen Hlophe oor die beweerde uitlatings by die RDK ingedien het “sodat dit nie onder die mat gevee kan word nie”.

Moerane was, toe Die Burger gister met hom gepraat het, nog nie bewus van die klagte nie, maar het gesê indien daar wel so ’n klagte ingedien is, sal dit ook môre deur die klagtekomitee bespreek word.

- Die Burger