‘Hebsug bedreig lewe op aarde’

DURBAN

Hebsug, materialisme en selfsug het die klimaatonderhandelings hier laat vasval en bedreig volgens ’n groep geestelikes die voortbestaan van lewe op aarde.

“Dit is God se ongelooflike skepping wat hier in Durban op die spel is,” het van die geestelikes gesê.

’n Koalisie van geloofsgroepe en geestelikes het gistermiddag by COP17 gesê hulle is diep teleurgesteld in die politieke leiers en doen ’n beroep op hulle om nóú die dooie punte op te los.

“Ons het net een planeet,” het hulle gesê.

Die koalisie het in ’n verklaring wat aan me. Christiana Figueres, uitvoerende sekretaris van die VN se sekretariaat oor klimaatsverandering, oorhandig is, gesê klimaatonderhandelings gaan nie net oor die ekonomie en tegnologie nie, maar is in sy wese ’n “morele, geestelike en kulturele kwessie”.

’n Emosionele Figueres het onderneem om die boodskap aan die 192 lande se onderhandelaars te bring.

Figueres het gesê sy is dankbaar dat die geestelike leiers hul geloof behou het en het hulle aangemoedig om met volgehoue druk die onderhandelings in die “regte rigting” te stuur.

Kardinaal Wilfred Napier, Rooms-Katolieke aartsbiskop van Durban, het gesê die geestelike leiers is “bekommerd dat Durban niks gaan oplewer nie”.

Hy het aan Figueres gesê hebsug en ekonomiese selfbelang laat die onderhandelings ontspoor. “Dit bedreig die voortbestaan van lewe op aarde.”

Biskop Geoff Davies van die omgewingsinstituut van die Suider-Afrikaanse geloofsgemeenskappe het daarop gewys dat “God se ongelooflike skepping híér in Durban op die spel is”.

“As mense vra wat het God met hierdie onderhandelings te doen, sê ek alles. Ons praat hier van God se skepping.”

Figueres het gesê “hierdie beraad gaan in die eerste plek oor God se Skepping, wat ons (die huidige geslag) net vir enkele sekondes in ons hande het”.

“Ons (geslag) het nie verantwoordelik teenoor ons natuurlike hulpbronne opgetree nie. Ons moet sorg dat iets daarvan vir ons kinders oorbly,” het sy gesê.

- Die Burger