Gordimer en Brink begin petisie teen beoogde mediawetgewing

Kaapstad

Twee internasionaal bekende Suid-Afrikaanse skrywers het pas begin met ’n petisie teen beoogde drakoniese mediawetgewing in Suid-Afrika.

Nadine Gordimer, ’n Nobelprys­wenner vir letterkunde, en André P. Brink, ’n veelbekroonde romansier en literator, het die petisie van stapel gestuur in reaksie op die omstrede Wetsontwerp op die Beskerming van Inligting.

Brink het op ’n vraag oor of hy – synde ’n skrywer wat self sensuur onder die vorige bedeling ervaar het – gedink het die dag sou weer daag wat dergelike vrese opnuut sou opvlam, gesê: “Ek dink sensuur was naasteby die heel laaste maatreël wat ons van die nuwe bedeling verwag het. Dit verraai ’n stompsinnigheid en kwaadwilligheid van die regering se kant wat ’n mens tot in jou fondamente skud.”

Hy het gesê in die geledere van die internasionale skrywersorganisasie PEN was daar ontsteltenis, “maar die implikasies van die beoogde nuwe wetgewing het nog nie wyd deurgesyfer nie”.

“Miskien omdat niemand dit verwag het van ’n regering wat verskans is agter die soort grondwet wat ons tans het nie. Die implikasie mag wees dat die huidige regering hom net so min aan ’n grondwet steur as aan enigiets anders op skrif. Ons nader vinnig wat Van Wyk Louw ‘die trans van die ongeletterdes’ genoem het.”

Hy het vertel PEN het al sy eie protes teen die wetsontwerp begin. “Ons hoop om nou met hulle saam te werk.

“Daar is talle ander protesaksies aan die prut in die land. Ek vermoed die regering het nie verwag hóé uitgebreid en heftig die verset gaan wees nie. Miskien het hy nog nie sy eie wetsontwerp behoorlik gelees of verstaan nie.

“Hierdie aksie is spesifiek bedoel vir skrywers, onder meer omdat die funksie en lot van skrywers in ’n samelewing ook elke leser in die land raak.”

Skrywers word aan ’n breë front deur die organiseerders genader, maar intussen kan enigeen van hulle wat belang stel ’n e-pos aan writers@mweb.co.za stuur.

Brink het oor die petisie gesê: “Ek het heelwat hoop dat omtrent geen skrywer van enige betekenis in Suid-Afrika op die duur buite dié aanslag gaan bly nie.”

- Die Burger