Giniel se pa praat oor jaer se teëspoed

Stellenbosch

Verlede jaar het Suid-Afrika gejuig oor die Dakar.

Eergister se teëspoed in die derde skof beteken dat die land se sterjaer ’n opdraande stryd het om ’n agterstand uit te wis.

“Dit is maar hoe dit in die Dakar gaan,” het mnr. Smittie de Villiers, pa van die kampioenjaer Giniel de Villiers, gesê.

Giniel, wat in 2009 die eerste deelnemer van Suid-Afrika was wat eerste in dié moordende tydren kon eindig, beklee ná gister se vierde skof die 20ste plek. Hy kon daarin slaag om vyfde te eindig nadat hy eergister teëspoed ondervind het.

Hy moes ná net 50 km van die derde skof eers stilhou toe sy Volkswagen ernstige enjinprobleme ondervind het.

“Ons is maar teleurgesteld,” het sy pa uit die Paarl gesê.

“Maar vanjaar was die ergste druk af. Die groot hype was verlede jaar. Dit was sy droom om te wen en hy het dit reggekry.”

De Villiers het gesê sy seun het met sy rug gesukkel. Maar ná ’n rug­operasie verlede jaar is Giniel baie meer ontspanne en sy rug weer honderd persent.

“Vir my gaan dit oor jou karakter wanneer jy probleme begin optel.”

Giniel het gesê in die Dakar-tydren maak dit nie saak hoe goed jou voertuig is nie, jy het steeds 50% geluk nodig, want enigiets kan gebeur.

De Villiers het vertel sy vrou, Annamarie, is ook teleurgesteld, maar veral bekommerd. Sy twee susters hou ook asem op.

“Die Dakar-tydren is maar gevaarlik. Ons is tevrede dat hy nog in die tydren is en nie in ’n ongeluk was nie. Giniel se filosofie is as jy in alles gevaar sien, moet jy maar in die bed bly.Vanjaar is dit seker maar sy beurt om bad luck te kry. Maar ’n lang tydren lê nog voor. Ons hoop sy slegte geluk is nou verby.”

Die tydren eindig op 16 Januarie in Buenos Aires.

- Die Burger