‘Gewone’ mense kan nou rugby uitsaai
2010-03-12 00:10
- Artikelopsies
- Deel
- Kry Die Burger op
Johannesburg
Rugbygeesdriftiges wat nog altyd iets oor rugbykommentators te sê gehad het, kry nou self die kans om kommentator te speel.
kykNET, die tydskrif TV Plus en SuperSport hou ’n talentsoek-kompetisie vir Afrikaanse TV-rugbykommentators.
Die kompetisie, genaamd Spiekeries (vernoem na die legendariese kommentator wyle Gerhard Viviers), word van 1 tot 4 April by die Absa-KKNK in Oudtshoorn aangebied.
Die fees duur tot 8 April.
“Almal kla ’n bietjie oor rugbykommentators. Nou kry gewone mense ’n geleentheid om hul staal te wys,” het mnr. Haddad Viljoen, reklamebestuurder van kykNET en MK, gesê.
Deelnemers moet met oorfone en ’n mikrofoon kommentaar lewer oor grepe uit groot rugbywedstryde wat op ’n grootskerm-TV vertoon sal word.
Die oud-Springbokke en aanbieders van die kykNET- program SuperRugby, Kobus Wiese, Breyton Paulse en Ashwin Willemse, is die beoordelaars.
Hulle sal deelnemers tot 20 uitdun.
Daaruit sal ’n topdrie volgens Viljoen gekies word.
Die wenner word op 5 April regstreeks op SuperRugby, wat Maandae om 20:30 uitgesaai word, aangekondig.
Die wenprys is om saam met ’n bekende kommentator waar te neem wanneer dié by ’n groot rugbywedstryd kommentaar lewer.
Mnr. Kobus Burger, programbestuurder van die KKNK, het gesê Spiekeries is deel van die fees se leefstylprogram.
“Dit bied iets anders om te doen vir mense wat nie teater toe wil gaan nie en dit is ook iets vir mans om te doen terwyl hul vroue in die teater is.”
Die kompetisie val saam met die fees se tema, “Fees van keuses”.
- Die Burger