Geskorste UV-studente op oorlogspad teen Jansen

Volksblad

Bloemfontein - Die Sasco-studente aan die Universiteit van die Vrystaat (UV), wat gister geskors is hangende ’n dissiplinêre ondersoek nadat hulle ’n week gelede intervarsity-wedstryde ontwrig het, en die Jong Kommuniste-liga (JKL) is op die oorlogspad.

Thomas (Tom) Thabane, sekretaris van Sasco op die kampus, skryf op Facebook, in ’n klaarblyklike ope brief aan prof Jonathan Jansen, rektor: “Baie voor jou, met groter wapens en baie meer toegewydheid het ons probeer stop en misluk. Jou pogings om ’n tsoenami te stop met ’n sambreel gaan nutteloos wees.”

Hy noem Jansen in die brief ’n “sogenaame comrade” wat studente bevoordeel wat in Afrikaans studeer.

“Hulle (Afrikaanse studente) het vroeër klasse, dosente wat vlot is in Afrikaans en beter wenke gee aan Afrikaanse studente.”

Hy beskuldig die UV-bestuur daarvan dat hy rassisme aanblaas deur nie aanstellings te doen uit die aangewese groepe nie, gebou-name behou waarmee swart studente nie identifiseer nie en die UV-wapen wat bestaan uit “voortrekker-horings” waarmee slegs 1% van studente kan identifiseer.

“’n Instelling wat jou misken as jy nie ’n Christen of Afrikaner is nie, hoort nie in ’n gemeenskap nie.”

Hy beskryf ’n studenteleier as ’n “aktivis” wat “verandering” wil teweegbring. “Dit is ons geboortereg wat ons van ons ouers, wat vryheidsvegters was, geërf het. Ons is ’n spesiale tipe mens wat net so lank soos hoëronderwys-instellings bestaan.”

Thabane versoek Jansen om op te hou om onwaarhede te verkondig soos dat die UV die mees getransformeerde universiteit in die wêreld is en om onmiddellik die leuen dat die UV ’n leier in transformasie is, van die UV-webwerf te verwyder.

Die JKL het ook in ’n giftige verklaring teen Jansen uitgevaar.

“Dis hartseer dat die eerste swart rektor van die UV verantwoordelik is vir die viktimisering van die eerste swart SR-president, op sy leliewit-kampus.”

Hulle beskuldig Jansen daarvan dat hy ’n “volkstaat” van die UV probeer maak en dat die “baas-mentaliteit” nog springlewendig op die kampus is.

“Ons sal die JKL en ander progressiewe organisasies op die kampus mobiliseer en die kampus onregeerbaar maak,” lui die verklaring.

Hulle doen ’n beroep op die minister van hoër onderwys, dr. Blade Nzimande, om in te gryp op die “Afrikaner-kampus”.

“Ons as die JKL belowe Jansen, wat eens een van ons was, oorlog as hy voortgaan om swart studente te viktimiseer en nie die skorsing op te hef nie. Dit is ’n belofte wat ons nie sal breek nie.”

Volg Nuus24 op Twitter

- Volksblad