Fortuin betaal vir 1964-port
2010-09-03 22:44
Paarl – ’n Bod van R62?000 is gister op die Nederburg-wynveiling in die Paarl op ’n Nigeriese koper toegeslaan vir ’n kis van ses bottels Nederburg Port 1964 waarop ’n reserweprys van R3 500 was.
Mnr. Obi Josephat Ndibe van Next International Nigeria Limited het aan Nonnie Dedekind gesê hy het dit vir sy oom gekoop wat 75 jaar oud is en ou wyne kan waardeer.
Sy kopie beteken dat die prys van elk van die bottels van 750 mF hom R10 333 gekos het. Dit was byna 18 keer meer as die minste waarmee die verkoper tevrede sou wees.
Dié port, wat ’n klompie gelukkiges gisteroggend vooraf kon proe, is van shiraz-druiwe gemaak.
Volgens die organiseerders was dit die enigste port wat ooit gemaak is deur die gevierde oud-wynmaker van Nederburg, mnr. Günter Brözel, wat al meer as twintig jaar gelede afgetree het.
Elk van die bottels is genommer en dra ’n seël.
Nog net één kis van ses bottels daarvan is oor, maar die organiseerders kan nie sê of dit eendag ook opgeveil sal word nie.
Die veiling se verkope op die eerste dag het meer as R3 miljoen beloop. Die pryse was aansienlik beter as dié van verlede jaar en die meeste aanbiedinge se reserwepryse is gou oorskry.
Ofskoon daar minder kopers was, was die bieëry straf en is meer gekoop.
’n Kis van tien bottels van 2005 se wenners van Absa se Toptien-pinotage-kompetisie het R6?200 gehaal, terwyl R9 800 betaal is vir ’n kis van ses bottels Zonnebloem Cabernet Sauvignon 1970.
Die veiling duur vandag voort met verskeie gesogte wyne wat nog baas soek.
Onder die lot is 23 bottels spesiale wyn van die vyf einste deelnemers aan die eerste veiling in 1975.
- Die Burger