Fiasko met talle opvoeders se vergoeding

Port Elizabeth en Kaapstad

Skerp kritiek is gister deur verskeie rolspelers uitgespreek teen die departement van onderwys se foutiewe uitbetaling van onderwysers se salarisse ingevolge die beroepspesifieke bedeling.

Die DA het die “onbevoegde optrede en swak beplanning” van die nasionale onderwysdepartement skerp gekritiseer.

Volgens die DA se woordvoerder oor onderwys, dr. Junita Kloppers-Lourens, is die party baie ongelukkig omdat die volledige bedrae vir die beroepspesifieke bedeling nie gister aan onderwysers betaal is nie.

Sowat R1 miljard van die R3,7 miljard van dié geld vir onderwysers is nog nie aan hulle uitbetaal nie.

Die Oos-Kaapse leierskap van Sadou was gister woedend nadat ’n groot deel van sy lede druipstert verneem het dat hul bankrekeninge nie voor Kersfees ’n sent stewiger gaan wees nie.

Die vergoeding sou terugwerkend van Julie bereken word.

“Ons is bitter kwaad as onderwysers, veral omdat niks aan ons gekommunikeer is voor die nasionale departement se aankondiging eergister nie,” het me. Fezeka Loliwe, provinsiale Sadou-sekretaris, gesê.

“Hierdie versuim van die onderwysdepartement om sy belofte en die skriftelike ooreenkoms na te kom, kom neer op ’n totale misbruik van onderwysers se vertroue.

“Ons ondersteun ten volle die departement se visie van gehalte-onderrig, maar hoe verwag hulle moet ’n onderwyser dit lewer wanneer hy of sy nie op die beloofde datum vergoed word nie?” het Loliwe gevra.

Dr. Granville Whittle, woordvoerder van die nasionale departement van basiese onderwys, het bevestig dat verkeerde bedrae aan onderwysers gister uitbetaal is omdat foute met hul datum van indiensneming op provinsiale vlak begaan is. Die fout sal glo eers in Januarie reggestel kan word.

Loliwe het gesê hul kantore is reeds oorval deur verslae onderwysers wat sommige tot soveel as R20 000 se terugwerkende beroepsverwante betaling verwag het.

“Sommige van ons lede het wel so R1 000 of R2 000 ontvang, maar sommige nie ’n sent nie.

“Vir ’n onderwyser wat gekwalifiseer het (vir vergoeding), om dit oor te kom, is ’n klap in die gesig.”

’n Onderwyser genaamd Bongi kla op die onderwyswebwerf ­teacherweb.co.za dat die Oos-Kaap sekerlik, soos altyd, aan die agterspeen gaan suig.

Mnr. Peter Duminy, Oos-Kaapse uitvoerende hoof van Naptosa, het gesê sy vakbond was probleme te wagte.

- Die Burger