Elvis speel-speel deur na top-9
2010-09-09 01:02
- Artikelopsies
- Deel
- Kry Die Burger op
George
Inwoners van George kan weer asem skep nadat Elvis Blue sonder enige figuurlike vals note deur is na die volgende ronde van die Idols-sangkompetisie.
Jamie-Lee Sexton, Jess Yallup en Gail Nkoane was vandeesweek die drie deelnemers onder die valbyl ná hulle die minste stemme van kykers ontvang het.
Nkoane is uiteindelik huis toe gestuur. Ofskoon die drie beoordelaars met ’n veto-stem die kans gehad het om Nkoane te “red” al het sy die minste stemme gelok, het hulle besluit om haar te pos.
Intussen het mnr. Faried Stemmet, burgemeester van die Eden-distriksmunisipaliteit, gister aan Die Burger gesê hy is baie bly dat ’n “kind van die Suid-Kaap reeds so ver gevorder het” in die kompetisie.
“Ons sal natuurlik baie bly wees as hy wen,” het hy bygevoeg.
Mnr. Bazil Petrus, burgemeester van George, het gesê dit is nie net hy wat trots is nie, maar die hele dorp. “Waar ook al George se mense presteer, is goeie nuus vir ons. Ons wens hom alle sterkte toe.
“Daar sal beslis gekyk word na hoe ons hom kan vereer (met sy terugkeer na die dorp).”
As alles goed verloop, lyk dit of Elvis eers in November na sy tuisdorp gaan terugkeer.
Intussen kan plaaslike aanhangers uitsien na sy beplande optrede by die Kalahari-teater en -restaurant in George op 24 November. Dié vertoning is ten bate van Bethesda Hospies, ’n plaaslike nie-winsgewende organisasie.
As een van die voorste nege Idols-deelnemers het Elvis Blue Woensdagaand die kans gehad om saam met die Suid-Afrikaanse groep The Parlotones by Monte Casino in Johannesburg op te tree.
Volgens Chireze Hoogendyk, Elvis se vrou, sou dit nie die eerste keer wees dat hy die verhoog met bekende musikante deel nie.
“Hy het al saam met Karen Zoid, Just Jinjer en Tree63 opgetree,” het sy gesê.
Elvis Blue, oftewel Jan Hoogendyk, is g’n groentjie in die musiekbedryf nie.
Hy het al vantevore onder die verhoognaam Mono opgetree en het vyf CD’s op sy kerfstok.
Hy sal Sondag weer om 17:30 op MNet te sien wees wanneer die laaste nege deelnemers die tema “Disco” aandurf.
- Die Burger