Els kruis swaarde met ander sangers

Johannesburg

Die sangeres Sonja Herholdt is “stomgeslaan” dat Jurie Els na haar aborsie in sy boek Ver van Vrede – My Volle Verhaal verwys het wat vandag op die rakke is.

“Dit is ou nuus,” sê Herholdt. “Jurie mors net ’n mens se tyd.”

Sy het ook gesê die dinge wat hy in sy boek kwytraak, raak haar nie en sy weet nie wat hy daarmee wil bereik nie.

Els praat in sy outobiografie hoe hy swaarde met Herholdt en ander musikante soos Patricia Lewis gekruis het en ook oor hoe hy deur Huisgenoot, Son, die radio-omroeper Gareth Cliff en komediant Leon Schuster te na gekom is. Hy verwys ook na Lewis se vermeende seksvideo en die skade wat sy loopbaan daardeur gely het. “Ek het soos Petrus by die vuur gevoel die aand toe Jesus in hegtenis geneem is. Ek was ‘guilty by association’. Dis maar die risiko wat ’n mens loop as jy ’n sangmaatjie kies,” skryf Els.

Hy staan ook feitlik die hele derde deel van sy boek getiteld “Niks” aan “Robbie se liegstories” af. Die ander twee gedeeltes, onderskeidelik “Niemand” en “Iemand” getitel, handel oor sy lewe van geboorte totdat hy en sy gesin in 2008 na Nieu-Seeland verhuis het. Hy verwys na spesifieke voorvalle soos Patricia Lewis se troue waarna hy nie genooi is nie, stryery tussen die Else en Huisgenoot oor troufoto’s en die manier waarop sy eerste kind in die media uitgebeeld is.

Els dra sy boek op aan sy kinders, Chrizette en Jason John, “sodat hulle eendag kan verstaan waaroor alles gegaan het”.

Volgens mnr. Johnny le Roux van Naledi-uitgewers sal Els nie in Suid-Afrika wees vir ’n amptelike bekendstelling van sy boek nie. “Jurie het die boek geskryf om sy naam in ere te herstel ná die Robbie Klay-skandaal,” sê Le Roux. “As dit nie was vir die kamtige skandale nie sou ons waarskynlik nie eens die boek uitgereik het nie.”

Le Roux sê hy kon die boek nie neersit nie en dit gaan hoofsaaklik oor dinge wat Els gepla het.

Klay se agent, mnr. Gert van Schalkwyk, sê dit is “verregaande” dat Els nou só ’n boek sal uitbring “net wanneer Robbie weer op sy voete gekom het”. Van Schalkwyk sê Klay gaan nie eens die boek koop nie.

Tussen 3000 en 5000 eksemplare van Els se boek is gedruk.

Le Roux verwag dat dit net so goed soos Els se vrou, Hestrie Cloete, se boek sal verkoop.

- Die Burger