Duisende sekswerkers gewerf

George – Duisende sekswerkers uit onder meer Oos-Europa gaan na verwagting na Suid-Afrika gesmokkel word vir die Wêreldbeker-sokkertoernooi.

Die New York Daily News het onlangs berig bykans 40?000 sekswerkers is reeds vir vanjaar se toernooi gewerf.

Mnr. Davis Bayever, voorsitter van die Suid-Afrikaanse Sentrale Dwelm-owerheid, het op ’n vergadering van die Verenigde Nasies se kantoor teen dwelms en misdaad gesê die regering is bekommerd oor ’n toestroming van sekswerkers na die toernooi.

Die Burger het vroeër van rolspelers in die Suid-Kaap verneem meer sekswerkers van groter ­stede word na die streek “ingevoer” met die oog op die sokkertoernooi.

Die sokkerspanne van Frankryk, Denemarke en Japan gaan hul tuisbasisse in die Tuinroete inrig.

Volgens Bayever word sekswerkers gelok met beloftes van geld. Sekswerkers, veral uit Oos-Europa, word blykbaar by die toernooi verwag en vrese bestaan dat kinders by die bedrywighede betrek kan word.

Hy het gewaarsku dat diegene wat die land onwettig probeer binnekom, vasgevat gaan word.

Na verwagting gaan meer as 400 000 mense die toernooi bywoon.

Mnr. Pieter Cronje, woordvoerder van die Kaapse 2010-span, het gesê die polisie sal gedurende die toernooi oorhoofs in bevel van sekuriteit wees. “Kaapstad se wetstoepassingseenhede tree ter ondersteuning van die polisie op.”

In die Suid-Kaap gaan die polisie ’n hoë sigbaarheid rondom die spanne se tuisbasisse in George en Knysna handhaaf, het kapt. Malcolm Pojie, ’n polisiewoordvoerder, gesê.

Die Wes-Kaapse departement van gesondheid beplan om meer kondome gedurende die toernooi te versprei.

Volgens Statistieke Suid-Afrika het die getal mense in Suid-Afrika wat MIV-positief is, van 4,1?miljoen in 2001 tot 5,2 miljoen verlede jaar toegeneem.

’n Uitreik-aksie deur die provinsiale gesondheidsdepartement na sekswerkers in die George-omgewing loop Saterdag ten einde.

Hulle word onder meer gewaarsku teen die gevare van MIV/vigs en ander seksueel oordraagbare siektes.

- Die Burger