‘Duikers het my man in see gelos’

Kaapstad

“Ek moet hom kry; dit is baie belangrik.”

Só het me. Jane Botha (43) gister gesê oor haar seun, Percival Botha (19), wat Sondag saam met mnr. Daniel Groenewald (44) vermis geraak het.

Hulle het op hul vissersboot uitgegaan om ’n groep mans te gaan help wat op ’n rubberboot by Buffeljagsbaai, naby Pearly Beach, ter see in die moeilikheid geraak het.

Mnr. Lester Davids (28), een van die mans wat op die rubberboot was, se lyk het Maandagoggend uitgespoel, terwyl van die ander mans uitgeswem het.

Me. Botha het gesê dit is vir haar belangrik om haar seun te kry om afsluiting te kry.

Mev. Hannelie Groenewald (43), Daniel se vrou, en mnr. Steven Botha, Percival se pa, het gister gesê Daniel en Percival het Sondagaand kort voor donker vanaf die kus gesien ’n “hele klomp” mans, onder wie duikers, het op die rubberboot in die moeilikheid geraak.

Hulle is in hul vissersboot daarheen en het die vrag en bemanning op die vissersboot gelaai. Die vissersboot het omgeslaan en die mans het begin terugswem kus toe.

“Hulle was duikers wat kon swem, en hulle het my man wat nie kon swem nie daar gelos,” het mev. Groenewald gister gesê. “Wie gaan vir my en my kind sorg?” Hulle het ’n driejarige seun, Reagan.

Steven Botha het gesê die duikers het aan hulle gesê Percival en Daniel was ver agter in die see en paniekerig. “Hulle het gesê hulle sou dit self nie maak as hulle hulle moes help nie,” het hy gesê.

“My seun was nog so jonk. Hy was goed gemanierd en baie behulpsaam,” het Botha sr. gesê.

Mnr. Gert Claassen, aanstaande skoonpa van Davids, het hom as ’n “lieflike mens” beskryf. “Ek mis hom al klaar.”

Davids sou in Maart met sy dogter, Grace (26), trou. Hulle het ’n driejarige dogter, Amber Davids.

Supt. Maree Louw, stasiebevelvoerder van die Bredasdorp-polisiestasie, het gesê polisieduikers sou gister na Groenewald en Botha soek, maar die see was nog te rof en die seewier te veel vir hulle om in die water te duik.

- Die Burger