Dobbelstene kan Kersbonusse gou verslind
2009-12-19 02:40
- Artikelopsies
- Deel
- Kry Die Burger op
Kaapstad. – Dobbelaars wat brand om hul Kersbonusse op ’n gelukkige val van die dobbelstene te wed, moet liewer twee keer dink.
Volgens die Nasionale Program vir Verantwoordelike Dobbelary (NPVD) word ’n toename in dobbelary oor die feestyd verwag, veral omdat Kersbonusse beteken mense het ’n ekstra geldjie vir dié soort vermaak.
Prof. Peter Collins, hoof van die NPVD, het die publiek gemaan om steeds ingeligte besluite te neem en verantwoordelik op te tree.
Luidens ’n verklaring word dobbelverwante probleme met veral onwettige en informele dobbelary in onder meer informele nedersettings verbind eerder as in casino’s.
“Casino’s is relatief duur en nie so toeganklik vir armer Suid-Afrikaners wat meer geneig is om in ’n geldelike verknorsing te beland nie,” het Collins gesê.
Volgens hom is daar toenemende kommer oor die negatiewe gevolge van dobbelary wat veral werkloses betrek.
Die getal dobbelverslaafdes of probleemdobbelaars in Suid-Afrika het sedert 2005 konstant gebly, volgens die webwerf www.responsiblegambling.co.za. Net sowat 0,5% van die bevolking ondervind ernstige dobbelverwante probleme en nog sowat 4% het matige probleme.
Die NPVD bied ook hulp en berading aan by hul tolvrye noodlyn by 0800 006 008.
- Die Burger