Departement het 3 regspanne vir hofsaak

Pretoria

Die aanstelling van drie aparte prokureursfirmas om die departement van verdediging en militêre veterane in die hof te verteenwoordig, kan die belastingbetaler tot vier soldate se jaarlikse verdienstes per dag uit die sak jaag.

Sou ’n saak vorder tot by die konstitusionele hof – soos wat verwag word met die hofsaak oor die onwettige optrede van soldate by die Uniegebou – gaan dit miljoene rande kos.

Intussen sit die staatsprokureurs glo bedroë sonder ’n verduideliking waarom hul dienste skielik nie meer goed genoeg is vir die weermag nie.

Só was daar twee weke gelede in die Pretoriase hooggeregshof drie stelle prokureurs en advokate om namens dr. Lindiwe Sisulu, minister van verdediging, mnr. Tsepe Mothumi, waarnemende sekretaris van verdediging, en genl. Godfrey Ngwenya, weermaghoof, op te tree.

Dít was in ’n dringende aansoek deur die SA Nasionale Weermag­unie (Sanwu) om die administratiewe ontslag van vier troepe van Potchefstroom te keer.

Volgens adv. Pikkie Greeff van Sanwu het al drie die regspanne dieselfde verweer gehad en dieselfde argumente, maar al drie het apart betaling gekry. Greeff reken die totale rekening vir dié een dag se verskyning moes sowat R402 000 beloop het.

Dít sluit in die reiskoste van een van die regsfirmas wie se kantore in die Kaap is en wat ’n prokureur en ’n advokaat Pretoria toe gevlieg het om in die hof te verskyn.

“Regter André Louw, wat die saak aangehoor het, het selfs in sy uitspraak gesê hy vind dit vreemd dat drie spanne advokate met dieselfde verwere saam in sy hof verskyn het,” het Greeff gesê.

Greeff reken die dag se regsrekening is meer as wat al vier die troepe se gesamentlike verdienste per jaar is.

Die departement van verdediging het vandeesweek gesê hy gaan nié op die kwesesie kommentaar lewer nie.

- Die Burger