Dan Roodt verloor lastersaak teen Die Burger

KAAPSTAD

Die nasionale persombudsman het ten gunste van Die Burger beslis nadat dr. Dan Roodt gekla het oor ’n meningsartikel wat in dié koerant verskyn het.

Volgens Roodt, ’n skrywer en leier van die Pro-Afrikaanse Aksiegroep (Praag), het die onafhanklike kommentator Ilse Bigalke se verwysings na hom as verregs, ’n rassis en ekstreem in ’n artikel van 24 November 2011, “Van hekse kom nie altyd onheil”, hom beswadder.

Voorts beweer hy die artikel het nie die konteks van ’n bespreking ten tyde van ’n televisieprogram oor wiskunde en swart prestasie verreken nie.

Volgens mnr. Johan Retief, adjunk-persombudsman, se bevinding wat Maandag uitgereik is, aanvaar hy Die Burger se verweer dat die verwysings geregverdigde kommentaar en in die openbare belang is.

Hy het gesê ’n lastereis wat Roodt vroeër teen onder meer Media24 gebring het omdat hy ’n rassis genoem is, is met koste van die hand gewys.

Dít beteken die hof aanvaar die stelling oor rassisme was waar of wesenlik waar, het Retief gesê.

“Hierdie argument is logies.

“Ek aanvaar dit as sodanig wat beteken dat Bigalke, soos Media24, geregverdig was om die verwysings in dispuut te gebruik.”

Retief het gesê dit is ’n meningsartikel wat ingevolge die perskode eerlik en sonder kwaadwilligheid uitgespreek moet word en alle beskikbare en relevante feite billik in ag neem.

“Ek het geen rede om te glo dat Bigalke haar mening oneerlik en kwaadwilliglik uitgespreek het en daardeur die Perskode oortree het nie,” het Retief bevind.

Retief is ook van mening die konteks, soos wat Roodt dit in ’n latere brief aan Die Burger gestel het, sou nie ’n “wesenlike verskil aan die artikel” maak nie.

Roodt het sewe dae om appèl aan te teken nadat hy die persombudsman se bevinding ontvang het.

- Die Burger