DA-LP weer vlugtig in hof oor beweerde verkragting
2010-09-07 02:39
- Artikelopsies
- Deel
- Kry Die Burger op
Kaapstad. – ’n DA-parlementslid en voormalige stadsraadslid wat van verkragting beskuldig word, het gister weer vlugtig in die Wynberg-landdroshof verskyn.
Die saak teen die LP is tot 16 September uitgestel en terselfdertyd na die Kaapse streekhof verwys.
Sy naam kan eers bekend gemaak word sodra hy gepleit het.
Hy is in Junie in hegtenis geneem en later op borgtog van R500 vrygelaat.
Die beweerde voorval het op 30 Mei by die LP se huis in Pelikan Park gebeur.
Die klaer is ’n 17-jarige meisie wat die nag by sy huis geslaap het nadat sy en ’n vriend daar gebraai het.
Die meisie het aangevoer sy het nie tot seks ingestem nie. Sy is toe na bewering verkrag.
Die LP het die aantygings ontken en aangedui hy sal skuld ontken wanneer die verhoor begin.
Hy het ná gister se vlugtige verskyning gesê daar sal hopelik teen sy volgende hofdatum meer duidelikheid oor die volgende stap in die proses wees.
Verskeie familielede en vriende het hom gister in die hof bygestaan.
“Tot dusver het ek baie eensaam gevoel. Ná gister se verskyning, met my familie en vriende daar om my te steun, voel ek nou weer asof mense my liefhet,” het hy gesê.
- Die Burger