Cope eis Zuma se kop in ‘goedkoop spel’
2010-02-09 05:36
- Artikelopsies
- Deel
- Kry Die Burger op
Johannesburg. – Pres. Jacob Zuma moet bedank omdat hy die land in die skande gesteek en verneder het, het Cope gister geëis.
As Zuma nie self bedank of die ANC hom dwing om dit te doen nie, sal Cope ’n mosie van wantroue in die parlement teen hom instel.
“Suid-Afrika het die bespotting van die wêreld geword. Die ANC sal moet kies tussen sy skandelike leier en die nasie,” het me. Charlotte Lobe, sekretaris-generaal van Cope, gesê na aanleiding van Zuma se bekentenis dat hy ’n buite-egtelike kind by me. Sonono Khoza verwek het.
“In ’n land met die hoogste MIV/vigs-syfers het die president versuim om ag te slaan op sy eie regering se oproep om die pandemie te beveg.
“Hy is geen rolmodel nie.”
Mnr. Mbhazima Shilowa, Cope-onderleier, het gesê Cope is besorg oor die nasie. “Ons het hoë vlakke van werkloosheid en armoede, en daar is mense wat nie weet waar hul volgende maaltyd vandaan sal kom nie. Dít moet die fokus wees.”
Mnr. Ishmael Mnisi, ANC-woordvoerder, het in reaksie gesê daar is geen grondwetlike of regsbasis vir Cope se eis dat Zuma bedank nie en die ANC beskou dit as ’n goedkoop politieke spel.
- Die Burger