Bobby is Cosmo se sexyste man
2012-02-04 03:00
- Artikelopsies
- Deel
- Kry Die Burger op
JOHANNESBURG. – Bobby van Jaarsveld het eers gedink hy hoor verkeerd toe hy Donderdagaand as die plaaslike Cosmopolitan se sexyste man van die jaar aangewys is.
Lesers van die vrouetydskrif het 13 mans benoem vir die titel en kon dan per SMS vir hul gunsteling stem.
Van Jaarsveld (24) het die meeste stemme gekry en weggestap met die titel, R10000 en ’n trofee.
Die trofee is in die vorm van ’n man se bolyf.
“Dit is wonderlik,” het hy gister gesê terwyl hy verleë gelag het.
“Toe hulle gepraat het van ’n sanger, het ek nie onmiddellik besef hulle praat van my nie.
“Hulle (die organiseerders) moes ’n tweede keer vir my sê ek het gewen.”
Bobby se mededingers het onder andere die Survivor: Maldives-deelnemer Lukhanyo Nontshinga, die Top Billing-aanbieder Janez Vermeiren en die sewes-rugbyspelers Neil Powell en Chris Dry ingesluit.
Gelukwensing van sy ondersteuners het op sy Twitter-profiel ingestroom nadat die aankondiging gedoen is.
Sy suster, Karlien, en sangers soos Sarah Theron en Johan C. Venter was van die eerstes om hom aanlyn geluk te wens.
“Mooi van binne en buite,” het sy ma en agent, me. Ronel Brink, getwiet.
Bobby en sy vrou, Annatjie, se seun, Sion is nou drie maande oud en die sanger sê hulle kry nie veel geslaap nie.
Nietemin maak hy seker hy kom drie keer ’n week by die gimnasium uit en hy hou maar dop wat hy eet – veral stysel en suiker.
- Die Burger