Binnelandse sake laat ernstige siek vrou maande lank wag

Kaapstad

’n Ernstige siek vrou wag al byna sewe maande lank vir ’n amptelike dokument van die departement van binnelandse sake.

Dit sal verseker dat sy haar by haar man en kinders in Spanje kan aansluit.

Boonop verval die huurkontrak van die huis waarin mev. Evelyn Kemp-Hart (45) in Kaapstad woon op 31 Desember.

Haar ma, mnr. Graham Hart, werk sedert verlede maand in Spanje in die sekerheidsbedryf nadat hy verplaas is.

Kemp-Hart, wat die afgelope week met gevorderde borskanker gediagnoseer is, probeer al sedert Junie vanjaar om ’n onverkorte huweliksertifikaat van die departement te bekom ten einde vir haar visum aansoek te kan doen.

Volgens Kemp-Hart het die departement haar in Oktober laat weet dat sy die sertifikaat kan kom afhaal, net om te vind dit is in die naam van haar man en sy gewese vrou uitgemaak.

Sy het gesê nóg die departement nóg die kerk waar sy en haar man in Oktober 2002 getroud is, kan hul afskrifte van die dokumente opspoor.

Ten einde raad het sy en haar man, twee getuies wat op die huwelikseremonie teenwoordig was sowel as die predikant, wat intussen na Australië verhuis het, be-­ edigde verklarings afgelê ten einde die geldigheid van die huwelik te bevestig.

Boonop het sy troufoto’s wat tydens die teken van die huweliksregister geneem is as ekstra bewyse bygevoeg.

Nadat Die Burger die departement van binnelandse sake gebel het om te probeer uitvind wat aangaan, is die onderneming gegee dat die nodige dokument Maandag gereed sal wees.

- Die Burger